Sudhakar Badgujar : सुधाकर बडगुजर यांचं अख्खं राजकारणच संपू शकतं... सीमा हिरेंनी डावच तसा खेळलाय!

Nashik Politics : शिवसेना उद्धव बाळासाहेब ठाकरे पक्षाचे उपनेते सुधाकर बडगुजर यांची आज (बुधवारी) पक्षातून हकालपट्टी झाली. पक्षविरोधी कारवाई केल्याचा ठपका ठेवत त्यांच्यावर कारवाई झाली. त्यानंतर ते भाजपमध्ये प्रवेश करण्याची शक्यता असतानाच भाजपच्या आमदार सीमा हिरे पदर खोचून उभ्या राहिल्या आहेत. त्यांनी तातडीची पत्रकार परिषद घेत बडगुजर यांची गुन्ह्यांची कुंडलीच बाहेर काढली. तसेच त्यांच्या भाजपप्रवेशाला कडाडून विरोध केला.

पण, सीमा हिरे यांनी ही पत्रकार परिषद घेत केवळ सुधाकर बडगुजर यांच्या भाजप प्रवेशालाच विरोध केलेला नाही, तर त्यांची गुन्ह्यांची आणि कारनाम्यांची सगळी कुंडली बाहेर काढून त्यांचा शिवसेना किंवा अन्य पक्षातील प्रवेशाचा मार्गही बंद केल्याची चर्चा आहे. हिरेंच्या पत्रकार परिषदेने भाजप आणि बडगुजर या दोघांचीही चांगलीच कोंडी झाली आहे. आधीच त्यांची शिवसेना उद्धव बाळासाहेब ठाकरे पक्षातून हकालपट्टी झाली आहे, त्यात भाजप प्रवेशाचा मार्ग बंद झाल्याने त्यांचं राजकारणच संकटात सापडल्याचे बोलले जाते.

सीमा हिरे यांनी काय आरोप केले?

सीमा हिरे म्हणाल्या, गेल्या दोन विधानसभा निवडणुकांमध्ये बडगुजर यांचा पराभव केला आहे. भाजपच्या अनेक कार्यकर्त्यांना धमकावणे आणि दहशत निर्माण करण्याचा प्रयत्न त्यांनी केला आहे. बडगुजर यांच्या विरोधात 17 गुन्हे दाखल आहेत. मुंबई बॉम्बस्फोटातील आरोपी सलीम कुत्ताबरोबर त्यांनी पार्टी करून डान्स केला होता. भाजप नेते बावनकुळे यांच्या प्रदेश दौऱ्यात त्यांच्या कसिनोचा फोटो देखील बडगुजर यांनीच व्हायरल केला. नारायण राणे यांना भरल्या ताटावरून उठविण्याचे काम बडगुजर यांचेच होते.

सुधाकर बडगुजर महापालिकेत टेंडर भरतात. त्यानंतर टेंडर मागे घेण्यासाठी आर्थिक तडजोड करतात. त्यांच्या मुलाने एका व्यक्तीवर गोळीबार केलेला आहे. या गुन्ह्यांबाबत त्यांच्या विरोधात कारवाई सुरू आहे. ही कारवाई टाळण्यासाठी आणि गुन्हे लपविण्यासाठी त्यांना भाजपमध्ये यायचे आहे. बडगुजर यांच्यामुळे भाजपच्या अनेक कार्यकर्त्यांना पक्ष सोडावा लागला आहे, अशीही खदखद हिरे यांनी व्यक्त केली.

भाजप पक्षात निष्ठावंत कार्यकर्त्याला न्याय दिला जातो. पक्षात लोकशाही आहे. प्रतिमा मलीन असलेल्या व्यक्तीला किती मतदान झाले हे पाहून पक्षश्रेष्ठी विचार करतील. आगामी महापालिका निवडणुकीत आम्ही शतप्रतिशत भाजप असा नारा दिला आहे. भाजपचे सर्व नगरसेवक निवडून येतील यासाठी आमचे जोरदार प्रयत्न आणि परिश्रम सुरू आहेत. बडगुजर यांचा भाजप प्रवेश झाल्यास पक्ष बॅक फुटवर जाईल. त्यामुळे कोणत्याही स्थितीत बडगुजर यांना भाजपमध्ये प्रवेश देऊ नये यावर आम्ही ठाम आहोत. बडगुजर यांची चर्चा होताच असंख्य कार्यकर्ते आणि नागरिकांनी फोन करून त्याला विरोध असल्याचे कळविले आहे, असेही हिरे यांनी सांगितले.

वरील परिस्थितीचा विचार करता, त्यांच्यावर दाखल गुन्हे पाहता आणि डागाळलेली प्रतिमा यातून पवित्र होण्यासाठीच बडगुजर यांची भाजपमध्ये येण्याची त्यांची इच्छा दिसते. त्यांच्या प्रवेशाच्या केवळ चर्चा आहे. याबाबत पक्षात अथवा पदाधिकाऱ्यांमध्ये कोणतीही चर्चा झालेली नाही. पक्षात वरिष्ठ निर्णय घेतात. मात्र बडगुजर यांना पक्षात घेण्यास आमचा विरोध असेल असे आमदार हिरे यांनी स्पष्ट केले. आता या आरोपांनंतरही बडगुजर यांना भाजपने प्रवेश दिल्यास जनतेत चुकीचा संदेश जाऊ शकतो.

बडगुजर यांची प्रचंड कोंडी :

आधी बडगुजर यांनी पक्षाचे खासदार संजय राऊत नाशिकमध्ये असतानाही मुख्यमंत्री देवेंद्र फडणवीस यांची भेट घेतली होती. त्यानंतर आपण पक्षात नाराज असल्याचे सांगत राजकीय महत्त्व वाढविण्याचा प्रयत्न केला होता. पण शिवसेना उद्धव ठाकरे पक्षाने वेळीच सावध होऊन त्यांच्यावर कारवाई केली. त्यानंतर ते भाजपमध्ये प्रवेश करणार असल्याच्या बातम्या आल्या. पण हिरे यांनी पदर खोचून मैदानात उतरत बडगुजर यांची कोंडी केली.