Unmesh Patil : बड्या नेत्याच्या कार्यालयातून दीड-दोन कोटींची रोकड चोरीला, उन्मेष पाटील यांचा खळबळजनक दावा

Maharashtra politics : शिवसेना उद्धव बाळासाहेब ठाकरे पक्षाचे नेते व माजी खासदार उन्मेष पाटील यांनी एक खळबळजनक दावा केला आहे. चाळीसगावात एका लोकप्रतिनिधीच्या कार्यालयातून चक्क दीड ते दोन कोटी रुपये चोरीला गेल्याचं त्यांनी म्हटलं आहे. चोरीच्या घटनेवर उन्मेश पाटील यांनी केलेल्या या दाव्यानंतर राजकीय वर्तुळात चर्चांणा उधाण आलं आहे.

एका महिलेबाबत घडलेल्या अन्यायावर भाष्य करताना उन्मेश पाटील यांनी हा दावा केला आहे. पाटील म्हणाले, चार दिवसांपूर्वी दीड-दोन कोटींच्या चर्चा आम्ही ऐकतोय. अंतोदय म्हणजे गरिबातला गरीब, दीन दयाळ उपाध्याय यांनी भाजपच्या स्थापनेवेळी जो विचार ठेवला होता, त्या नावाच्या कार्यालयात कोट्यवधी रुपयांची चोरी झाली. मुळात एवढे कोट्यवधी रुपये तिथे येतात तरी कसे? कोट्यावधींची रोकड येतच कशी? असा सवाल त्यांनी उपस्थित केला आहे.

ते अंतोदय कार्यालय आहे की, व्यापाराचे कार्यालय आहे? एक तर त्या कार्यालयाचे अंतोदय नाव बदलून टाका, कशाला त्या दीन दयाळ उपाध्याय यांचा अपमान करताय असं पाटील म्हणाले. तसेच त्यांनी यावेळी महिलेवरील अन्यायाच्या प्रकरणावरुन आमदार मंगेश चव्हाण यांच्यावर निशाणा साधला. जिल्हा नियोजन समितीच्या बैठकीत आमदारांना आक्रोश करावा लागतो. गुन्हा दाखल व्हावा म्हणून पोलिस ठाण्यात ठिय्या करावा लागतो याचा अर्थ आमदार चव्हाण यांचा गृहमंत्री देवेंद्र फडणवीस यांच्यावर विश्वास राहिला नाही असा टोला उन्मेष पाटील यांनी लगावला.

उन्मेष पाटील म्हणाले, मला चार मुद्यांवर या घटनेची पार्श्वभूमी स्पष्ट करायची आहे. स्टंटबाज, नौटंकीबाज लोकप्रतिनिधी कसा असतो, याचं उत्तम उदाहरण म्हणजे चाळीसगावचे सध्याचे सन्माननीय आमदार साहेब आहेत. आपल्या सगळ्यांना ज्ञात आहे की, गेल्या दोन वर्षांपूर्वी कापसाच्या काट्यातून शेतकऱ्याला लुटलं जातं कॅमेरा, सोशल मीडिया सगळी सज्ज टीम जसं काही ..डायरेक्टर आणि प्रोड्युसर लावून पिक्चर केला गेला. असा त्या शेतकऱ्याला न्याय देण्याचा व्हिडीओ राज्यभर व्हायरल झाला. असं वाटलं की काय शेतकऱ्याच्या हिताचा विचार करणारा हा कार्यकर्या तयार झालाय. लाखो लोकांनी तो व्हिडीओ पाहिला. पण प्रत्यक्षात त्या शेतकऱ्याला ना पैसे मिळाले, ना काही कार्यवाही झाली ना गुन्हा दाखल झाला. केवळ चर्चा आणि चर्चा झाली असं उन्मेष पाटील म्हणाले.

दीड वर्षापूर्वी एका कॅफेची तोडफोड करुन चुकीची कामे, लैंगिक शोषण होत असतील या अनुषंगाने व्हिडीओ बनवला. तो व्हिडीओ पाहून मुलींच्या पालकांना असं वाटलं की, हा न्याय देणारा आहे. पोलीस आणि नगरपालिकेच्या लोकांसोबत जावून तिथे तोडफोड केली. त्याचा व्हिडीओ सोशल मीडियावर व्हायरल केला, व्हिडीओचे पेड प्रमोशन केले , मी कसा वेगळा आहे, असं दाखवण्याचा प्रयत्न केला. मंगेश चव्हाण यांना लोकप्रियतेचा आजार झाला आहे", अशी टीका उन्मेश पाटील यांनी यावेळी केली.

एकीकडे तुम्ही स्त्री शक्तीचे गोडवे गातात आणि दुसरीकडे अत्याचार झालेल्या नारीला तुम्ही डीपीडीसीच्या बैठकीत म्हणतात येरे येरे तीला बोलव रे..म्हणजे उलट गुन्हा दाखल करत कारवाई होऊन शिक्षा कशी होईल याकडे लक्ष न देता, मी कसा वेगळा आहे हे दाखवून स्टंटबाजी करण्याचा व लोकप्रियतेचा आजार त्यांना झाला आहे. त्या आजारातून बाहेर काढण्याचे प्रयत्न करावे लागतील. कारण या आजारामुळे प्रचंड नुकसान होत आहे. अबला -अत्याचार झालेली महिला का मागे थांबली? तिच्यावर दबाव होता का? असा सवाल त्यांनी उपस्थित केला.