Yeola explosives seizure : नाशिकच्या येवल्यात एवढा मोठा स्फोटकसाठा आला कुठून? 5 हजारांहून अधिक जिलेटीन कांड्या, 1595 डिटोनेटर जप्त

Yeola explosives seizure : नाशिकच्या येवला तालुक्यातील वाईबोथी गावात दहशतवादी विरोधी पथकाच्या नाशिक युनिटने व येवला तालुका पोलिसांनी धडक कारवाई करीत स्फोटकांचा मोठा साठा जप्त केला आहे. खदाणीच्या कामासाठी शासकीय परवानगीशिवाय मोठ्या प्रमाणात स्फोटक पदार्थांचा साठा करून ठेवल्यात आला होता.

पोलिसांनी वाईबोथी येथील साई मातोश्री स्टोन क्रशर परिसरात कारवाई करत तब्बल ५ हजार ६५ जिलेटीन कांड्या आणि १ हजार ५९५ व्यावसायिक डिटोनेटर जप्त केले आहेत. तिघांविरुद्ध गुन्हा दाखल करण्यात आला असून त्यातील संशयित भगवान सुरेश वाघ याला अटक करण्यात आली आहे. तर इतर दोन जण फरार असून त्यांचा शोध सुरु आहे.

वाईबोथी येथील साई मातोश्री स्टोन क्रशर परिसरात मोठ्या प्रमाणात स्फोटक पदार्थ साठवून ठेवल्याची गुप्त माहिती पोलिसांना मिळाली होती. खदाणीच्या कामासाठी कोणत्याही शासकीय परवानगीशिवाय हा साठा करण्यात आल्याने छापा टाकण्यात आला. स्फोटक पदार्थांचा अशा प्रकारे अनधिकृत साठा केल्याने मानवी जीवितास तसेच परिसरातील सुरक्षिततेस धोका निर्माण होण्याची शक्यता असल्याने पोलिसांनी कायदेशीर कारवाई केली.

पोलिस शिपाई सचिन दराडे यांनी दिलेल्या फिर्यादीवरून तालुका पोलिस ठाण्यात गुन्हा दाखल करण्यात आला आहे. नितीन भास्कर गायकवाड (रा. अंगणगाव, ता. येवला), भगवान सुरेश वाघ (रा. वाईबोथी, ता. येवला) आणि शरद आप्पासाहेब भड (रा. धामोडे, ता. येवला) अशी गुन्हा दाखल झालेल्या संशयितांची नावे आहेत.

संशयितानी आर्थिक फायद्यासाठी खदाणीच्या कामाकरिता कोणत्याही शासकीय परवानगीशिवाय स्फोटक पदार्थ साठवून ठेवले होते. त्यामुळे मानवी जीवितास आणि सुरक्षिततेस धोका निर्माण होण्याची शक्यता असल्याचे फिर्यादीत नमूद करण्यात आले आहे. स्फोटकांचा साठा बेकायदा बाळगल्याने मुख्य पुरवठादार एटीएसच्या रडारवर आला असून त्याची चौकशी सुरु होणार आहे.