Savarkar Defamation Case : स्वातंत्र्यवीर सावरकर बदनामी प्रकरणी राहुल गांधींना उलट तपासणीची संधी? 7 एप्रिलला होणार सुनावणी

Savarkar Defamation Case : विरोधी पक्षनेते राहुल गांधी यांनी काही वर्षांपूर्वी स्वातंत्र्यवीर सावकर यांच्या विषयी आक्षेपार्ह विधान केले होते. स्वातंत्र्यवीर सावकर यांविषयी केलेल्या वादग्रस्त विधानाप्रकरणी सावरकरांचे नातू सात्यकी सावरकर यांनी राहुल गांधींविरोधात न्यायालयात मानहानीचा दावा दाखल केला आहे. त्याची सुनावणी बुधवारी (ता.19) पुणे न्यायालयात झाली.

बदनामी खटल्यात उलट तपासणीसाठी पूर्ण संधी मिळावी, अशी विनंती राहुल गांधी यांच्यातर्फे त्यांच्या वकिलांकडून करण्यात आली. तसेच बदनामीचा हा खटला समरी ट्रायल ऐवजी समन्स ट्रायलमध्ये वर्ग करावा असा अर्ज देखील राहुल गांधी यांच्या वकिलांनी केला

या अर्जावर फिर्यादी व आरोपी अशा दोन्ही बाजुंनी युक्तिवाद झाला. फिर्यादी सात्यकी सावरकर यांचे वकील एस. ए. कोलाटकर यांनी फिर्यादी यांचे वतीने न्यायालयात युक्तिवाद केला तर राहुल गांधींच्या बाजूने वकील मिलिंद पवार यांनी युक्तिवाद केला आज पुणे न्यायालयाने दोन्ही बाजूंचे युक्तिवाद ऐकल्यावर पुढील सुनावणी सात एप्रिल रोजी ठेवण्यात आली आहे

काय आहे संपूर्ण प्रकरण?

राहूल गांधींनी इंग्लंडमधील एका कार्यक्रमादरम्यान सावरकरांवर टीका केली होती. सावरकरांचे पाच सहा मित्र एका मुस्लीम व्यक्तीला मारहाण करत होते आणि ते पाहून सावरकरांना आनंद होत होता, असं सावरकरांनी त्यांच्या पुस्तकात लिहून ठेवल्याचा दावा राहूल गांधींनी केला होता. सात्यकी सावरकर यांनी राहुल गांधींच्या या वक्तव्याच्या विरुद्ध न्यायालयात खटला दाखल केला आहे.