Ajit Pawar : "तुम्हाला निपटवून टाकू", अजितदादांच्या आमदारांची महिला मुख्याधिकाऱ्याला धमकी

Maharashtra Politics: उपमुख्यमंत्री अजितदादा पवार यांच्या राष्ट्रवादी काँग्रेसचे आमदार राजू कोरमोरे यांनी महिला मुख्याधिकाऱ्याला धमकावलं आहे. याची ऑडिओ क्लिप व्हायरल झाली आहे. यात महिला अधिकाऱ्याला कोरमोरे यांनी निपटून टाकू, असा दम भरला आहे. करिश्मा वैद्य, असं महिला अधिकाऱ्याचं नाव आहे. त्या तुमसर नगरपालिकेच्या मुख्याधिकारी आहेत.

उपमुख्यमंत्री अजितदादा पवार ( Ajit Pawar ) यांची तुमसर येथे जनसन्मान यात्रा पार पडली. शुक्रवारी पाऊस झाल्यानं हेलिपॅडवर चिखल झाला होता. त्यावरून राजू कोरमोरे यांची थेट महिला अधिकाऱ्याला धमकवण्यापर्यंत मजल गेली. याची ऑडिओ क्लिप समाजमाध्यमांमध्ये व्हायरल झाली.

ऑडिओ क्लिपमध्ये काय?

आमदार कोरमोरे : तुम्ही बदला घेण्याची भावना ठेवत आहात..

मुख्याधिकारी : विषय काय झाला?

आमदार कोरमोरे : तुम्ही पूर्ण आमच्या कामाचा सत्यानाश करत आहात. तुमच्या एकातरी कर्मचाऱ्यानं सहकार्य केलं का?

मुख्याधिकारी : दिवसभर कर्मचारी तिथे होते..

आमदार कोरमोरे : मी दिवसभर हेलिपॅड येथे होतो. एकही कर्मचारी तिथे नव्हता.

मुख्याधिकारी : रामटेके म्हणून कर्मचारी तिथे होते.

आमदार कोरमोरे : तुम्हाला खूप महागात पडेल. मी याचा बदला घेणार..

मुख्याधिकारी : बदला कशासाठी घेणार?

आमदार कोरमोरे : तुमच्याकडून जमत नव्हते, तर सांगायचं होतं. आमच्यात दम आणि ताकद आहे कार्यक्रम करून घेण्याची. तुम्ही विकारग्रस्त आहात. जास्त बकबक नको. तुम्हाला निपटवून दाखवतो. सहकार्य करायचं सोडून पूर्ण सत्यानाश करायचा.

"जनप्रतिनिधीचा अपमान, अधिकाऱ्याची मगरूरी..."

याबद्दल आमदार कोरमोरे यांनी तो आपलाच आवाज असल्याचं एका वृत्तपत्राला म्हटलं आहे. "आपण चुकीचे काही बोललो नाही किंवा शिवीगाळही केली नाही. केवळ कार्यक्रमादरम्यान झालेल्या कामचुकारपणाबद्दल विचारले. हा जनप्रतिनिधीचा अपमान असून मगरुरी आहे," असा आरोप आमदार कोरमोरे यांनी केला.