Vidarbha Politics : विदर्भात काँग्रेसला आणखी एक मोठा धक्का! मोर्शीच्या माजी आमदाराचे पुत्र लवकरच भाजपमध्ये जाणार

Nagpur News, 12 Aug : अमरावती जिल्ह्यातील मोर्शी विधानसभा मतदारसंघात एक मोठी राजकीय घडामोड सुरू झाली आहे. काँग्रेसचे माजी आमदार नरेशचंद्र ठाकरे यांचे चिरंजीव व युवा नेते विक्रम ठाकरे भाजपच्या संपर्कात असल्याचे समोर आले आहे.

लवकरच ते भाजपमध्ये प्रवेश करणार असल्याची चर्चा सुरू आहे. राज्याचे महसूलमंत्री व अमरावती जिल्ह्याचे पालकमंत्री चंद्रशेखर बावनकुळे यांच्या प्रमुख उपस्थितीत त्यांच्या प्रवेश समारंभाचे नियोजन केले जात आहे. यामुळे विदर्भात काँग्रेसला आणखी एक मोठा धक्का बसणार आहे.

काँग्रेस आणि राष्ट्रवादी काँग्रेसच्या आघाडीमुळे सुमारे 20 वर्षांपासून मोर्शी विधानसभा मतदारसंघावर राष्ट्रवादी काँग्रेसचा दावा आहे. त्यामुळे सातत्याने काँग्रेसच्या इच्छुकांवर अन्याय होत आहे. सुमारे 20 वर्षांपासून या मतदारसंघ राष्ट्रवादी काँग्रेससाठी सोडला जात आहे.

भविष्यात येथे काँग्रेसला संधी उपलब्ध होण्याची शक्यता नसल्याने विक्रम ठाकरे यांनी भाजपची वाट निवडली असल्याचे समजते. 199 च्या विधानसभेच्या निवडणुकीत काँग्रेसचे नरेशचंद्र ठाकरे निवडून आले होते. मात्र 5 वर्षात हर्षवर्धन देशमुख यांनी बंडखोरी करून त्यांना पराभूत केले.

त्यानंतर अनिल बोंडे सलग दोन वेळा येथून निवडून आले. त्यानंतर स्वाभिमानी पक्षाचे देवेंद्र भुयार आणि आता भाजपचे चंदू यावलीकर येथून निवडून आले आहेत. 1962 पासून हर्षवर्धन देशमुख आणि अनिल बोंडे यांनाच येथून दोन वेळा निवडून येता आले आहे. विक्रम ठाकरे यांनी गेल्या विधानसभेच्या निवडणुकीत मोर्शी विधानसभेचे तिकीट मागितले होते.

मात्र, हा मतदारसंघ सोडण्यास राष्ट्रवादी काँग्रेसने नकार दिला होता. त्यामुळे ठाकरे यांनी बंडाचे निशान फडकावले. देवेंद्र भुयार स्वाभिमानी पक्षाचे आमदार असले तरी उपमुख्यमंत्री अजित पवार यांच्या राष्ट्रवादीमध्ये त्यांनी प्रवेश केला होता. असे असतानाही भाजपने या मतदारसंघावरील आपला हक्क सोडला नाही.

त्यांनीही दावेदारी दाखल केली होती. दोन राष्ट्रवादीचे उमेदवार आणि ठाकरे यांच्या दावेदारीमुळे भाजपचे फावले. चंदू यावलीकर येथून प्रथमच निवडून आले आहेत. भविष्यात हा मतदारसंघ पुन्हा राष्ट्रवादीकडेच जाईल असे दिसत असल्याने ठाकरे यांनी आपली पावले भाजपकडे वळविली आहेत.

विक्रम ठाकरे यांनी स्थानिक कृषी उत्पन्न बाजार समितीच्या निवडणुकीत भाजपचे नेते व खासदार अनिल बोंडे यांच्याशी युती केली होती. तेव्हापासूनच विक्रम ठाकरे हे भाजपमध्ये जाणार असल्याची चर्चा सुरू झाली होती. अलीकडेच त्यांनी काँग्रेसच्या कार्यकर्त्यांचा मेळावा घेतला होता.

यावेळी कार्यकर्त्यांनी ठाकरे यांना भाजपमध्ये प्रवेश करावा अशी आग्रहाची मागणी केली होती. ती त्यांनी मान्य केली असल्याचे दिसते. विक्रम ठाकरे यांनीसुद्धा आपण वेगळा विचार करीत असल्याचे सांगून भाजपमध्ये प्रवेश करणार असल्याच्या वृत्ताला दुजोरा दिला आहे.