Muslim wedding card : लग्नपत्रिकेत ‘दोन प्रेरणास्थानं’; शिवाजी महाराजांसोबत टिपू सुलतान, मंत्री राणेंची कडवी भूमिका

Amravati wedding card controversy : अमरावतीच्या वलगाव इथल्या हिंदू-मुस्लिम कौमी एकता मंच कार्यवाह असलेल्या मुस्लिम युवकांच्या लग्नपत्रिकेत प्रेरणास्थान म्हणून छत्रपती शिवाजी महाराज आणि टिपू सुलतान यांचा एकत्रित उल्लेखावरून राजकीय वाद पेटला आहे.

भाजप मंत्री नीतेश राणे यावर आक्रमक होत, अशा पद्धतीच्या लग्नपत्रिका पाकिस्तानमध्ये छापल्या असत्या, तर योग्य होतं, अशी प्रतिक्रिया नोंदवली आहे.

अमरावतीच्या वलगाव इथली एका मुस्लिम (Muslim) युवकाची लग्नपत्रिका समाज माध्यमांवर चांगलीच व्हायरल होत आहे. या लग्न पत्रिकेत हिंदू-मुस्लिम एकतेचे प्रेरणास्थान म्हणून छत्रपती शिवाजी महाराज आणि टिपू सुतलान यांचा उल्लेख आहे.

टिपू सुलतान यांचे, गुरू म्हणून पुरनैय्या पंडित यांचा उल्लेख केला आहे. याशिवाय टिपू सुलतान यांनी, 156 मंदिरांना जमिनी दान दिल्या. तसेच काशीच्या मंदिराला (Temples) दहा हजार सोन्याचे शिक्के दिले, असा उल्लेख केला आहे.

तर दुसरीकडे छत्रपती शिवाजी महाराज यांचे राजकीय गुरू याकुब शहा यांचा उल्लेख केला आहे. याकुब धोटेचा दर्गासाठी रत्नागिरीला 100 एकर जमीन दान दिली. महाराजांनी रायगडावर जगदिश्वर मंदिरासोबत मशीद सुद्धा बांधली, असा उल्लेख केला आहे.

छत्रपती शिवाजी महाराजांबरोबरच टिपू सुलतान यांचा प्रेरणास्थान म्हणून उल्लेख केल्याचे पुरोगामी विचारवंतांनी स्वागत केले असतानाच, राजकीय हिंदुत्वावादी संघटनांना यावर चर्चा करत आहेत. यातच भाजप मंत्री नीतेश राणे यांची या लग्न पुत्रिकेवर जोरदार प्रतिक्रिया आली आहे.

मंत्री नीतेश राणे यांनी या लग्न पत्रिकेवर बोलताना, "ज्या टिपूने आमच्या हिंदू राष्ट्रात मोठ्या प्रमाणात धर्मांतर केलं, ज्याने नेहमीच हिंदूद्वेष केला त्याला, आम्ही महाराष्ट्रात आणि हिंदू राष्ट्रात स्थान देत नाही. अशा पद्धतीच्या लग्नपत्रिका पाकिस्तानमध्ये छापल्या असत्या, तर योग्य होत. आमच्या इथं या सगळ्या गोष्टी मान्य नाहीत," असे म्हंटलं आहे.