Katol political controversy over caste validity: काटोलच्या राजकारणात मोठी उलथापालथ घडवणारी घटना समोर आली असून नगरपरिषदेच्या सत्ताकारणावर त्याचे दूरगामी परिणाम होण्याची शक्यता व्यक्त केली जात आहे.
नगराध्यक्षा अर्चना देशमुख यांचे जात प्रमाणपत्र अवैध ठरल्याने त्यांचे नगराध्यक्षपद धोक्यात आल्याची चर्चा राजकीय वर्तुळात रंगू लागली आहे. या निर्णयामुळे काटोलमधील राजकीय समीकरणांमध्ये मोठे बदल होण्याची शक्यता निर्माण झाली आहे.
नागपूर जिल्हा जात प्रमाणपत्र पडताळणी समितीने अर्चना देशमुख यांचा कुणबी समाजातील असल्याचा दावा फेटाळून लावत त्यांचे जात प्रमाणपत्र रद्द करण्याचा निर्णय दिला आहे. देशमुख यांनी ओबीसी प्रवर्गासाठी राखीव असलेल्या नगराध्यक्षपदाच्या निवडणुकीत विजय मिळवला होता. मात्र त्यांच्या जात वैधतेबाबत आक्षेप नोंदवल्यानंतर हे प्रकरण पडताळणी समितीकडे गेले होते.
माहितीनुसार, देशमुख यांनी 11 November 2025 रोजी जात पडताळणीसाठी अर्ज सादर केला होता. या प्रक्रियेदरम्यान भाजपच्या उमेदवार कल्पना उमप यांच्यासह आणखी काही जणांनी हरकती दाखल केल्या होत्या. त्यानंतर या प्रकरणाची सुनावणी 12 June रोजी झाली.
समितीने सादर करण्यात आलेली कागदपत्रे, शालेय नोंदी, वंशावळ आणि इतर पुराव्यांची तपशीलवार छाननी केली. तपासादरम्यान अर्जदार आणि त्यांच्या वडिलांच्या शालेय दाखल्यांमध्ये ‘मराठा’ अशी जात नमूद असल्याचे आढळून आले. तसेच आजोबांच्या उपलब्ध कागदपत्रांमध्ये जातीची स्पष्ट नोंद नसल्याचेही समितीच्या निदर्शनास आले.
या सर्व बाबींचा विचार करून समितीने 19 June रोजी अंतिम निकाल जाहीर केला. कुणबी, कुणबी-मराठा किंवा मराठा-कुणबी असा दावा सिद्ध करण्यासाठी आवश्यक पुरावे उपलब्ध नसल्याचा निष्कर्ष नोंदवत जात प्रमाणपत्र रद्द करण्याचे आदेश देण्यात आले.
या निर्णयामुळे नगराध्यक्षपदावर प्रश्नचिन्ह निर्माण झाले असून स्थानिक राजकारणात नव्या चर्चांना उधाण आले आहे. दरम्यान, अर्चना देशमुख या निर्णयाविरोधात न्यायालयात जाण्याची शक्यता व्यक्त केली जात असल्याने पुढील कायदेशीर घडामोडींवर सर्वांचे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.