Sandeep Kshirsagar : बीडमध्ये आणखी एक ट्विस्ट; संतोष देशमुख खूनप्रकरणी आक्रमक भूमिका घेणाऱ्या संदीप क्षीरसागरांनी घेतली अजितदादांची भेट (Video)

Pune, 16 February : बीडच्या राजकारणात पुन्हा एकदा ट्विस्ट आला आहे. भारतीय जनता पक्षाचे आमदार सुरेश धस यांनी राज्याचे अन्न व नागरी पुरवठा मंत्री धनंजय मुंडे यांची भेट घेतल्याने राजकीय वर्तुळात जोरदार वाकयुद्ध रंगले आहे. विशेषतः मराठा समाज आणि मनोज जरांगे पाटील यांनी सुरेश धस यांच्या विरोधात कठोर भूमिका घेतलेली असताना राष्ट्रवादी काँग्रेस शरदचंद्र पवार पक्षाचे आमदार संदीप क्षीरसागर यांनी जुन्नमध्ये जाऊन भेट घेतली आहे, त्यामुळे राजकीय वर्तुळात पुन्हा एकदा खळबळ उडाली आहे.

संतोष देशमुख खूनप्रकरणी आमदार संदीप क्षीरसागर (Sandeep Kshirsagar) यांनी आक्रमक भूमिका घेतलेली आहे. विशेषतः धनंजय मुंडे यांच्यावर ते तुटून पडले आहेत. देशमुख खूनप्रकरणाचा तपास लागेपर्यंत नैतिकतेच्या आधारावर धनंजय मुंडे यांनी राजीनामा द्यावा, अशी मागणी संदीप क्षीरसागर यांनी अनेकदा केलेली आहे. तसेच सुरेश धस यांच्या मुंडे यांच्यासोबतच्या भेटीवर त्यांनी टीका केली हेाती.

दरम्यान, धनंजय मुंडे यांच्यावर टीका करणारे आणि संतोष देशमुख खूनप्रकरणी कठोर भूमिका घेणारे आमदार संदीप क्षीरसागर यांनी पुणे जिल्ह्यातील जुन्नर तालुक्यात येऊन उपमुख्यमंत्री अजित पवार (Ajit Pawar) यांची भेट घेतली आहे. या भेटीदरम्यान पवार आणि क्षीरसागर यांच्यात काय चर्चा झाली, याची माहिती मिळू शकलेली नाही. मात्र, दोघांमध्ये बराच वेळ गुफ्तगू सुरू होते.

सुरेश धस यांनी धनंजय मुंडे यांची भेट घेतल्याने बीडचे राजकारण पुन्हा पेटले आहे. सुरेश धस यांच्यावर मनोज जरांगे पाटील यांच्यापासून विरोधकांकडून टीकेची झोड उठवलेली असतानाच आता संदीप क्षीरसागर आणि अजित पवार यांची भेट झाल्याचे पुढे आले आहे. त्यामुळे संदीप क्षीरसागर हे या भेटीवर काय स्पष्टीकरण देतात, हे पाहावे लागणार आहे.

संदीप क्षीरसागर हे राष्ट्रवादी काँग्रेस शरदचंद्र पवार पक्षाकडून बीड मतदारसंघातून निवडून आले आहेत. राज्यात महायुतीचे सरकार आले असून विकास कामांसाठी शासकीय निधीची गरज मोठ्या प्रमाणात भासणार आहे, हे लक्षात घेऊन संदीप क्षीरसागर यांनी अजित पवार यांच्याशी जवळीकता वाढवली का, अशी चर्चा या भेटीच्या निमित्ताने होत आहे.