भाजप आमदाराचा डाव प्रशासनाने हाणून पाडला, आईच्या नावाने बांधलेले अम्मा स्मारक अवैध ठरवून हटवले

Summary :

1. चंद्रपूर आमदार किशोर जोरगेवार यांच्या आईच्या नावाने बांधलेले अम्मा स्मारक अवैध ठरवून प्रशासनाने हटवले.

2. "मी म्हणेल तो कायदा" अशी भूमिका घेणाऱ्या जोरगेवार यांना या कारवाईने मोठा धक्का बसला आहे.

3. या निर्णयामुळे जिल्ह्यात जोरदार राजकीय चर्चा सुरू झाली असून त्यांच्या प्रतिमेला फटका बसला आहे.

Chandrapur News : 'मी म्हणेल तो कायदा' म्हणणारे भाजपचे चंद्रपूरचे आमदार किशोर जोरगेवार यांना प्रशासनाने मोठा झटका दिला आहे. त्यांच्या आईच्या नावाने उभारण्यात येत असलेल्या अम्मा स्मारकाच्या बांधकामाला अवैध ठरवून ते हटवण्यात आले आहे.

शहरातील सर्वाधिक वर्दळीच्या महात्मा गांधी चौकाचे नाव बदलून अम्मा जोरगेवार करण्याचा प्रस्ताव चंद्रपूर पालिकेला देण्यात आला होता. त्याविरोधात काँग्रेसच्या कार्यकर्त्यांनी आंदोलनाचा इशारा दिला आहे. सोबतच याच चौकात उभारल्या जात असलेले अम्मा स्मारक अवैध असल्याचीही तक्रार करण्यात आली होती. हे स्मारक महापालिकेच्या सात मजली इमारतीला लागून बांधले जात आहे. जोरगेवार यांच्या आई अम्मा जोरगेवार याचा चौकात टोपल्या विकायच्या. त्यामुळे त्यांनी या जागेची स्मारकासाठी निवड केली आहे.

भर चौकात आणि व्यावसायिक इमारतीच्या शेजारी स्मारक उभारले जात असलेल्या या स्मारकाला येथील व्यापाऱ्यांचा विरोध केला होता. या विरोधात काँग्रेसच्या पदाधिकाऱ्यांनी महापालिका आयुक्तांना निवेदन देऊन यास विरोध केला होता. आयुक्तांनी अवैध स्मारक तोडण्याचे आश्वासन दिले दिले होते. तर नामकरण आणि स्मारकाचा मुद्दा संवेदनशील झाला होता.

गोवा मुक्ती आंदोलनात शहीद झालेले बाबूराव थोरात तसेच स्वातंत्र्यासाठी लढा देणाऱ्यांचे शहरात कुठेच नाव दिसत नाही. मात्र आमदाराच्या आईच्या स्मारकाचे काम तातडीने केले जात असल्याची तक्रार मुख्यमंत्री देवेंद्र फडणवीस यांच्याकडे केली होती. हा शहीद व स्वातंत्र्य सैनिकांचा अपमान नाही का? असा उद्विग्न सवाल त्यांनी केला होता.

शहीद बाबूराव थोरात यांचे पुत्र विजय थोरात यांनी मुख्यमंत्र्यांना लिहिलेल्या पत्रात त्यांनी स्वातंत्र्यवीर आणि शहिदांच्या नावाचीसुद्धा यादी जोडली. दरम्यान आमदार जोरगेवार यांच्या कार्यालयाच्यावतीने आमदारांनी गांधी चौकाचे नाव बदलण्याचा प्रस्ताव दिला नसल्याचा खुलासा केला होता.

स्मारकाचा वाद चिघळत असल्याने भारतीय पुरातत्त्व विभागाने याची दखल घेतली. स्मारकाच्या शेजारी एक प्राचीन मंदिर आहे. त्याला केंद्रीय संरक्षित स्मारक म्हणून घोषित करण्यात आले आहे. नियामनुसार संरक्षित क्षेत्राच्या शंभर मीटर परिसरात इतर बांधकाम व अतिक्रमण करण्यास मनाई आहे. या नियमांचा दाखल देऊन पुरातत्त्व विभागाने महापालिकेला नोटीस बजावली होती. त्यात सात दिवसांच्या आत अतिक्रमण हटवण्याचे निर्देश देण्यात आले होते. त्यानुसार अम्मा स्मारकाचे अतिक्रमण हटवण्यात आले

FAQs :

प्रश्न 1: प्रशासनाने कोणती कारवाई केली?
👉 जोरगेवार यांच्या आईच्या नावाने उभारण्यात आलेले अम्मा स्मारक अवैध ठरवून हटवले.

प्रश्न 2: या कारवाईमुळे काय परिणाम झाले?
👉 जोरगेवार यांच्या राजकीय प्रतिमेला धक्का बसला असून जिल्ह्यात वादंग पेटला आहे.

प्रश्न 3: जोरगेवार कोण आहेत?
👉 किशोर जोरगेवार हे चंद्रपूरचे आमदार असून "मी म्हणेल तो कायदा" या विधानामुळे ते चर्चेत राहिले आहेत.