Shivsena News : काँग्रेसचा राजीनामा अन् थेट एकनाथ शिंदेंची भेट; लोकसभेला 4 लाख मतं घेणाऱ्या नेत्याच्या राजकीय खेळीची चर्चा

Dr. Abhay Patil : राजकारणात एखादी भेट औपचारिक असू शकते; मात्र त्या भेटीची वेळ आणि पार्श्वभूमी राजकीय असेल, तर चर्चा होणे स्वाभाविक आहे. अकोल्यातील वैद्यकीय तज्ज्ञ व सामाजिक कार्यकर्ते तसेच २०२४ च्या लोकसभा निवडणुकीतील काँग्रेसचे उमेदवार डॉ. अभय पाटील यांनी मुंबईतील ‘नंदनवन’ येथे उपमुख्यमंत्री एकनाथ शिंदे यांची घेतलेली सदिच्छा भेट सध्या अकोल्याच्या राजकीय वर्तुळात चर्चेचा विषय आहे.

ही भेट औपचारिक असल्याचे सांगितले जात असले, तरी काही दिवसांपूर्वी डॉ. पाटील यांनी काँग्रेसमधील पदाचा राजीनामा दिला होता. त्यावेळी वैद्यकीय सेवा आणि सामाजिक कार्यासाठी अधिक वेळ देण्याची भूमिका त्यांनी मांडली होती. त्यामुळे त्यानंतर शिंदे यांच्याशी झालेली भेट ही राजकीयदृष्ट्या कुतूहल निर्माण करणारी आहे.

२०२४ च्या अकोला लोकसभा निवडणुकीत डॉ. अभय पाटील यांनी काँग्रेसचे उमेदवार म्हणून ४ लाख १६ हजारांहून अधिक मते मिळवली. भाजपचे अनुप धोत्रे विजयी झाले; मात्र डॉ. पाटील यांनी दिलेली लढत चुरशीची ठरली. मात्र, या मतांकडेही वस्तुनिष्ठपणे पाहण्याची गरज आहे. काँग्रेसचा पारंपरिक मतदार, महाविकास आघाडीचे समीकरण, स्थानिक राजकीय परिस्थिती, भाजपविरोधी मतदान आणि उमेदवाराची वैयक्तिक प्रतिमा या सर्व घटकांचा त्या निकालात सहभाग होता. त्यामुळे भविष्यात डॉ. पाटील यांनी राजकीय भूमिका बदलल्यास २०२४ मधील संपूर्ण मतशक्ती आपोआप त्यांच्यासोबत येईल, असा निष्कर्ष चुकीचा ठरू शकतो. ते पुन्हा सक्रिय राजकारणात येतील का? कोणता राजकीय पर्याय स्वीकारतील? स्वतंत्र भूमिका घेतील का? या प्रश्नांची उत्तरे आगामी काळात मिळतील.

डॉ. पाटील यांनी काँग्रेसपासून राजकीय अंतर कायम ठेवले किंवा अन्य राजकीय पर्याय स्वीकारला, तर काँग्रेससमोर अकोल्यात प्रभावी चेहरा उभा करण्याचे आव्हान निर्माण होऊ शकते. डॉ. पाटील यांच्या संभाव्य राजकीय भूमिकेचा सर्वाधिक परिणाम भाजपच्या गणितावर होण्याची शक्यता आहे. जर डॉ. पाटील महायुतीच्या राजकारणात सक्रिय झाले, तर काँग्रेसमधील एक परिचित चेहरा विरोधी राजकीय अवकाशातून दूर होऊ शकतो. त्यामुळे भाजपला अप्रत्यक्ष फायदा होण्याची शक्यता आहे. परंतु येथे दुसरी बाजूही तितकीच महत्त्वाची आहे. डॉ. पाटील जर एकनाथ शिंदे यांच्या नेतृत्वाखालील शिवसेनेत सक्रिय झाले, तर महायुतीतील स्थानिक राजकीय शक्तिसंतुलनावर परिणाम होऊ शकतो.

शिवसेनेसाठी विस्ताराची संधी

शिंदे यांच्या भेटीचा राजकीय संदर्भ पुढे वाढला आणि डॉ. पाटील यांनी शिवसेनेचा पर्याय स्वीकारला, तर अकोल्यात शिवसेनेला वैद्यकीय, सामाजिक आणि युवक क्षेत्राशी जोडलेला चेहरा मिळू शकतो. मात्र, पक्षात प्रवेश करणे आणि त्या माध्यमातून संघटन उभारणे या दोन वेगळ्या प्रक्रिया आहेत. डॉ. पाटील यांच्यासोबत प्रत्यक्षात किती कार्यकर्ते, सामाजिक पदाधिकारी आणि स्थानिक प्रभावशाली व्यक्ती येतात, हेच त्यांच्या नव्या राजकीय भूमिकेचे वजन निश्चित करेल. यात वंचित बहुजन आघाडीची भूमिका दुर्लक्षित करता येणार नाही. २०२४ मध्ये वंचितला मिळालेली मोठी मतसंख्या अकोल्यातील निवडणूक गणितात तिचे महत्त्व अधोरेखित करते. डॉ. पाटील यांची पुढील भूमिका आणि वंचितची आगामी रणनीती यांचा एकत्रित परिणाम अकोल्यातील निवडणूक गणितावर होण्याची शक्यता आहे.