Vijay Wadettiwar : आता शिवसेनेचा ‘उदय' झाला भाजपला लाडका; विजय वडेट्टीवारांचा टोला (पाहा VIDEO)

Nagpur News : उपमुख्यमंत्री एकनाथ शिंदे वारंवार नाराज होत असल्याने भाजपची डोकेदुखी वाढत चालली आहे.

तसेही त्यांची आता गरज संपली आहे. त्यामुळे शिंदेंना बाजूला सारून शिवसेनेचा ‘उदय' भाजपला जास्त लाडका झाल्याचे माजी विरोधीपक्ष नेते विजय वडेट्टीवार यांनी सांगितले. या माध्यमातून त्यांनी शिंदे यांची शिवसेनाही फुटणार असल्याचे संकेत दिले.

एकनाथ शिंदे यांचे नाराजी दाखवून अधिक काही पदरात मिळते का? हेच करीत आहेत. त्यामुळे त्यांची परिस्थिती बिकट आहे. त्यांना बाजूला करण्याचेही प्रयत्न केले जात आहे. भाजपने (BJP) उद्धव ठाकरे यांची शिवसेना फोडून शिंदेंना आपल्याकडे आणले. आता त्यांनाच फोडण्याचे प्रयत्न केले जात आहे. अशी सध्याची राजकीय परिस्थिती असल्याचे विजय वडेट्टीवार यांनी सांगितले. विशेष म्हणजे, संजय राऊत यांनीसुद्धा उदय सामंत यांच्याकडे 20 आमदार असल्याचे सांगितले आहे. त्यामुळे काहीतरी शिजत असल्याची चर्चा सध्या जोरात सुरू आहे.

पालकमंत्री पदाबाबतही महायुतीमध्ये सावळागोंधळ सुरू आहे. एवढे बहुमत असताना आपसात मतभेद वाढले आहे. सत्तेसाठी, पैसे मिळवण्यासाठी ही स्पर्धा सुरू आहे. त्यामुळे ‘भांडा सौख्यभरे‘ असे म्हणण्याची वेळ आली आहे. आज दोन जिल्ह्याचे पालकमंत्री बदलले. उद्या मंत्री बदलायची, नंतर उपमुख्यमंत्री आणि शेवटी मुख्यमंत्री बदलायची वेळ या सरकारवर येईल, असेही भाकीत विजय वडेट्टीवार (Vijay Wadettiwar) यांनी वर्तविले.

पंकजा मुंडे यांना आता दुःख करून काही मिळणार नाही. एक-एक ओबीसीचे मत घेऊ महायुती सत्तेवर आली. आता ओबीसीच्या नेत्यांना मात्र पद्धतशीरपणे नेतृत्वहीन करायचे प्रयत्न भाजप करीत आहे. यावेळी वडेट्टीवार यांनी धनंजय मुंडे यांनाही टोला लगावला. राष्ट्रवादी काँग्रेसच्या नवसंकल्प शिबिरात मुंडे यांनी पहाटेच्या शपथविधीला जाऊ नका, घात होईल, असा सल्ला आपण दिल्याचा दावा केला होता.

यावर वडेट्टीवार म्हणाले, "अंगावर आल्यावर सगळे आठवते. त्यावेळेस का नाही आठवले? पुढाकार घेऊन रोखले का नाही? असा सवाल करून दादासोबत जाणारा पहिला माणूस धनंजय मुंडे स्वतःच होता असेही सांगितले. सिल्लोड येथील बांगलादेशीच्या मुद्यावरून भाजपचे नेते किरीट सोमया यांनाही वडेट्टीवार यांनी आव्हान दिले".

'अब्दुल सत्तार मंत्री असताना त्यांना बांगलादेशी कधीच दिसले नाहीत.आता ते मंत्रिमंडळात नाहीत. त्यामुळे आता बांगलादेशी आठवायला लागले. भाजपकडे साडेसात वर्षापासून गृहमंत्रीपद आहे. तेव्हाच का त्यांना रोखले नाही. मतांचे पोलोरायझेशन करण्यासाठी हे सर्व सुरू आहे', असा आरोपही यावेळी वडेट्टीवार यांनी केला.