Devendra Bhuyar : ..तर तलवारीने हात छाटल्याशिवाय राहणार नाही ; देवेंद्र भुयारांचे वादग्रस्त विधान

Devendra Bhuyar : राष्ट्रवादीचे आमदार देवेंद्र भुयार यांनी केलेल्या वादग्रस्त विधानामुळे ते अडचणीत येण्याची शक्यता नाकारता येत नाही. वरूड (जि. अमरावती) येथे राष्ट्रवादी कार्यकर्ता मेळावा शुक्रवारी झाला. यावेळी राष्ट्रवादी काँग्रेसचे नेते, माजी मंत्री एकनाथ खडसे व्यासपीठावर होते. त्यावेळी जनतेला संबोधित करताना देवेंद्र भुयार यांनी हे वादग्रस्त विधान केले आहे.

देवेंद्र भुयार म्हणाले, "कुणी म्हणतो भुयार भाजपमध्ये चालला पण मला जायचे असते तर तेव्हाच गेलो असतो, गुजरातमार्गे गुवाहाटीत अन् खोके घेऊन आलो असतो. आता कोरड्या भाकरीवर जाऊ का नागपूरकडे जायचे असते तर आधीच गेलो असतो. पैशांचा आपला विषय नाही. मी शेती करायला सक्षम आहे, माझे हात काही बांधले नाहीत.चुकीच्या पद्धतीने राजकारण करणे हा माझा स्वभाव नाही. भुयार पैसे घेतो का, भुयारचे काही वेगळे धंदे आहेत का? याचा शोध घेतला जातो पण मी सांगतो, मला काही लोक जाणीवपूर्वक बदनाम करण्याचा प्रयत्न करीत आहेत,"

"बरेच लोक म्हणत होते की, मागच्यावेळी फुकट निवडणूक जिंकली आता पुढच्या वेळी काय? समोरची निवडणूक कठीण आहे कस करायचे. पण मी त्यांना सरळ सांगतो की, ज्या दिवशी निवडणुकीत चिकन, मटण आणि पैसे वाटायचे काम येईल त्या दिवशी राजकारणाचा धंदा सोडून शेती करायला जाईल. वडिलांची अठरा एकर शेती आहे,"असे भुयार म्हणाले.

भुयार म्हणाले, "निवडणूक आली की, देशमुख विरुद्ध पाटील असा सामना रंगवला जातो. जातीचे विष पेरले जाते. मुंबईच्या ठाकरेंची दहशत काल, आज आहे आणि उद्याही असेल, तुमची दहशत नदीच्या काठापर्यंतच आहे. आमच्या नादाला लागायचे नाही. शिवाजी संस्थेच्या निवडणुकीत जाणीवपूर्वक धक्काबुक्की केली पण याद राखा यानंतर राष्ट्रवादी कॉंग्रेस पक्षाच्या कुठल्याही कार्यकर्त्यांना धक्का लावला तर तलवारीने हात छाटल्याशिवाय राहणार नाही. जूना देवेंद्र भुयार अंगात आणला तर तुमची पाटीलकी काढल्याशिवाय राहणार नाही,"