Eknath Shinde : 'जितना जलोगे, जल कर एक दिन...'; दिल्ली सत्कारावरील टीकेला एकनाथ शिंदेंचा शेरो शायरीतून 'उबाठा'ला टोला

Mumbai News : दिल्लीत अखिल भारतीय मराठी साहित्य संमेलनात उपमुख्यमंत्री एकनाथ शिंदे यांचा ज्येष्ठ नेते शरद पवार यांच्याहस्ते सत्कार झाला. महाजी शिंदे राष्ट्रगौरव पुरस्कार देऊन हा सन्मान झाला.

शरद पवार यांनी शिंदेंचा दिल्लीत केलेल्या या सत्कारावर शिवसेना उद्धव बाळासाहेब ठाकरे सेना पक्षाचे खासदार संजय राऊत यांनी नाराजी भावना व्यक्त केली. संजय राऊत पुढंही या भूमिकेवर ठाम राहिले. एकनाथ शिंदे यांनी उबाठाला गोंदिया इथल्या शिवसेना मेळाव्यातून शेरो शायरीतून जोरदार उत्तर दिलं.

उपमुख्यमंत्री एकनाथ शिंदे म्हणाले, "दिल्लीमध्ये (Delhi) महादजी शिंदे राष्ट्रगौरव पुरस्कार दिला. महादजी शिंदे महापराक्रमी होते. त्यांच्या नावाचा पुरस्कार मिळणे अभिमानाची बाब आहे. परंतु इथं पोटदुखी सुरू झाली. 'उबाठा'च्या पोटात चांगली कळ आली. जितना जलोगे, जल कर एक दिन खुद ही राख हो जाओगे, अशी परिस्थिती झाली आहे".

'पुरस्कार मला मिळाला. अमित शाह, शरद पवार (Sharad Pawar), महादजी शिंदे, साहित्यिकांचा अपमान केला. तुम्ही सगळ्यांचा अपमान केला. कुठे फेडणार हे पाप. एकनाथ शिंदे डरनारा नाही', असे देखील उपमुख्यमंत्री शिंदेंनी ठणकावले.

धमक्यांवर शिंदे म्हणाले...

धमकीच्या आलेल्या मेलवर एकनाथ शिंदे म्हणाले, "एकनाथ शिंदे कोणत्याही धमकीला घाबरत नाही. मी बाळासाहेब, दिघेसाहेबांचा शिवसैनिक आहे. दिघेसाहेब असताना डान्सबार, लेडीज बार बंद केले. तेव्हा देखील खूप धमक्या आल्या. जेव्हा मी गडचिरोलीचा पालकमंत्री होतो, तेव्हा देखील नक्षलवाद्यांनी धमक्या दिल्या. नक्षलवाद्यांना कंठस्नान घालण्याचे काम गडचिरोलीच्या पोलिसांनी केले. त्याचा मला अभिमान आहे. सगळ्या धमक्यांना पुरून उरणारा, एकनाथ शिंदे आहे".

दाढीच्या केसालाही...

'कोरोना काळात दोनदा कोविड झाला. तरी मागे हटलो नाही. लाडक्या बहिणी, जनता पाठीशी आहे, तोपर्यंत माझ्या जीवाला सोडा, दाढीच्या केसाला कोणी धक्का लावू शकणार नाही. कुणाची हिंमत नाही', असेही एकनाथ शिंदे यांनी म्हटले.