Devendra Fadnavis : 'राज ठाकरेंना महायुतीत येण्याचा स्कोप नाही', देवेंद्र फडणवीसांनी स्पष्टच सांगितलं

Mahayuti News: राज ठाकरे यांच्या महाराष्ट्र नवनिर्माण सेनेने जवळपास सर्वच विधानसभा मतदारसंघात उमेदवार उभे केले आहेत. माहीम विधानसभा मतदारसंघातून त्यांचे पुत्र अमित ठाकरे निवडणूक लढवत असल्याने मुख्यमंत्री शिंदे यांनी शिवसेनेचे उमेदवार सदा सरवणकर यांना निवडणुकीच्या रिंगणातून माघार घ्यावी, अशी विनंती केली असल्याची चर्चा आहे.

या जागेवरून सध्या राज्यात चांगलाच वाद निर्माण सुरू असला तरी मनसे महायुतीत सहभागी होईल याचा कुठलाच स्कोप नसल्याने उपमुख्यमंत्री देवेंद्र फडणवीस यांनी स्पष्ट केले.

राज ठाकरे आमचे मित्र आहेत. सध्या तरी ते महायुतीत नाही. त्यांनी अनेक ठिकाणी महायुतीच्या विरोधात उभे केले आहे. यावरून ते महायुतीत सहभागी होतील, असे दिसत नाही. सध्या भाजप,शिवसेनेने, राष्ट्रवादी आणि रिपाई अशी युती आहे. आम्ही एकत्र लढत आहोत, असे फडणवीस म्हणाले.

राज ठाकरे यांनी लोकसभेच्या निवडणुकीत महायुतीला बिनशर्त पाठिंबा दिला होता. विधानसभेच्या निवडणुकीमध्ये त्यांची भूमिका वेगळी आहे. त्यांनी महायुतीच्या विरोधात देखील उमेदवार उभे केले आहेत. हे बघता ते महायुतीत सहभागी होतील याचा कुठलाही स्कोप आपल्याला दिसत नसल्याचे फडणवीस यांनी स्पष्ट केले.

मनसेचे उमेदवार निवडणुकीच्या रिंगणातून माघार घेणार नसल्याने महायुतीच्या विरोधात ते लढणार आहे. महायुती असो महाविकास आघाडी आणि मनसे इतर पक्ष आघाड्यांसोबत स्वतंत्रपणे लढत आहे. एखाद दोन जागी मुख्यमंत्र्याच्या मान्यतेने मदत करता येईल. उदाहरणार्थ शिवडीच्या जागेवर मुख्यमंत्री यांनी भूमिका घेतली आहे याकडे फडणवीस यांनी लक्ष वेधले.

राज्यात पुन्हा महायुतीचे सरकार येणार आहे. मुख्यमंत्री कोणाचा होणार हा प्रश्न नाही. सध्या मुख्यमंत्री एकनाथ शिंदे यांच्या सरकारमध्ये आम्ही काम करीत आहोत. त्यांच्या नेतृत्वात निवडणुकीला सामोरे जात आहोत. जरांगे पाटील दिवसातून तीन वेळा माझे नाव घेतात. ज्यांनी खऱ्या अर्थाने 1982 पासून पासून मराठा समाजाचे आरक्षण अडवून ठेवले त्यांच्याद्दल ते काही बोलत नाही. त्यामुळे मला त्यांच्याबद्दल काही  बोलायचे नाही असेही फडणवीस यांनी सांगितले.