आमदार रवी राणांवरील गुन्ह्यासंदर्भात मी किंवा मुख्यमंत्र्यांनी कोणतेही निर्देश दिले नव्हते

मुंबई : छत्रपती शिवाजी महाराजांचा पुतळा विनापरवानगी उभारल्याप्रकरणी बडनेराचे आमदार रवी राणा (Ravi Rana) यांच्यावर ३०७ अंतर्गत गुन्हा दाखल झाला आहे. महापालिका आयुक्तांवर शाई टाकल्यानंतर अमरावतीत वातावरण बिघडले होते, त्यामुळे कठोर कारवाई करण्याशिवाय पोलिसांकडे दुसरा मार्ग नव्हता. आमदार राणा त्यादिवशी दिल्लीत असताना त्यांच्यावर ३०७ चा गुन्हा दाखल झाला असेल तर तो कोणत्या परिस्थितीत दाखल झाला आहे, याची चौकशी करून अहवाल मांडण्यात येईल. याबाबत कुठलीही कृती करण्यासाठी मी किंवा मुख्यमंत्र्यांनी कोणतेही निर्देश दिले नव्हते, असे राज्याचे गृहमंत्री दिलीप वळसे पाटील (Dilip Walse Patil) यांनी आज विधानसभेत सांगितले. (Inquiry will be held into the crime against MLA Ravi Rana : Dilip Walse Patil)

आमदार रवी राणा यांच्यावर ३०७ अंतर्गत गुन्हा दाखल झाल्याचा विषय त्यांनी स्वतः आज विधानसभेत मांडला होता. तसेच, विरोधी पक्षनेते देवेंद्र फडणवीस यांनीही या विषयावर भाष्य करत सरकारने भूमिका स्पष्ट करावी, अशी मागणी केली. त्यावर गृहमंत्री दिलीप वळसे पाटील यांनी वरील उत्तर दिले.

गृहमंत्री वळसे पाटील म्हणाले की, अमरावती येथे छत्रपती शिवाजी महाराजांचा पुतळा विनापरवानगी उभारण्यात आला होता. जिल्हाधिकाऱ्यांच्या परवानगीशिवाय राज्यात कुठलाही पुतळा बसवता येत नाही, हा राज्याचा नियम असून तो सगळीकडे पाळला जातो. या पुतळ्याची उंची इतकी लहान होती की, रस्त्यावर चालता चालता त्या पुतळ्याला कुणाचाही हात लागू शकत होता. त्यामुळे प्रशासनाने निर्णय घेऊन अमरावती महापालिकेच्या आयुक्तांनी नियमाप्रमाणे पुतळा हटवला, त्यासाठी त्यांनी पोलिस संरक्षण मागितले होते. आयुक्तांनी नियमांप्रमाणे त्यांच्या अधिकारात कारवाई केली आहे, असा दावाही गृहमंत्र्यांनी विधानसभेत बोलताना केला.

ज्यादिवशी मनपा आयुक्तांवर शाई टाकण्यात आली, त्यादिवशी अमरावतीमध्ये असे वातावरण निर्माण झाले होते की, पोलिसांना कठोर कारवाई करण्याशिवाय दुसरा मार्ग नव्हता. तरीही आमदार रवी राणा त्यादिवशी दिल्लीत असताना त्यांच्यावर ३०७ चा गुन्हा दाखल झाला असेल, तर तो कोणत्या परिस्थितीत दाखल झाला, याची चौकशी करावी लागेल. या संदर्भात कुठलीही कृती करण्यासाठी मी किंवा मुख्यमंत्री उद्धव ठाकरे यांनी कोणतेही निर्देश दिले नव्हते. जेव्हा राज्याच्या एखाद्या भागात कायदा आणि सुव्यवस्थेचा प्रश्न गंभीर होतो, परिस्थिती स्फोटक होते, तेव्हाच मुख्यमंत्री वा गृहमंत्री त्याची माहिती घेण्याचा प्रयत्न करतो, असे वळसे पाटील यांनी स्पष्ट केले.

यानंतरही सभासदांच्या भावना लक्षात घेऊन अतिरिक्त महासंचालक, कायदा व सुव्यवस्था यांच्याकडून याप्रकरणाची चौकशी करुन, त्यांच्या अहवालावर विरोधी पक्षनेते यांच्यासोबत चर्चा करण्यात येईल, अशी भूमिका गृहमंत्री वळसे पाटील यांनी विधानसभेत बोलताना मांडली.