CM of Maharashtra : मुख्यमंत्री कोण होणार? नागपूरकरांनी ठरवून टाकलं, पोस्टर्सही झळकली...

Nagpur News : महायुतीला बहुमत प्राप्त झाले असतानाही आठ दिवासांपासून राज्यात सत्ता स्थापन झालेली नाही. मुख्यमंत्री कोण होणार, यावर अद्याप संभ्रम आहे. रोज नवी नावे आणि नवे समीकरण समोर येत आहे. माजी मुख्यमंत्री देवेंद्र फडणवीस यांच्या नावाला मोदी-शाह यांची पसंती असल्याचे सांगण्यात येते. मात्र अधिकृत घोषणा झालेली नाही. त्यामुळे पाच तारखेपर्यंत सर्वांच्या प्रतीक्षा ताणल्या गेल्या असताना नागपूरमध्ये भले मोठे पोस्टर झळकले आहे.

‘मी पुन्हा येईल'असा उल्लेख असलेले पोस्टर सर्वांचे लक्ष वेधून घेत आहे. कोणाचेही नाव यावर नसले तरी फडणवीस यांची पाठमोरी प्रतिमा आहे. हे बघता देवेंद्र फडणवीस हेच महाराष्ट्राचे मुख्यमंत्री होणार असल्याचा संदेश पोस्टरच्या माध्यमातून देण्यात आला असल्याचे दिसून येते.

रोज घडणाऱ्या राजकीय घडामोडी, भेठीगाठी, भाजपच्या केंद्रीय नेतृत्वाचे धक्कातंत्र, अलीकडेच मध्य प्रदेश, छत्तीसगड राज्यात सत्ता आल्यानंतर भाजपने निवडलेला मुख्यमंत्री बघता फडणवीस हेच मुख्यमंत्री होतील, असे दाव्याने कोणी सांगू शकत नाही. भाजपचे नेतेही मुख्यमंत्री कोण होणार, हे सांगताना थबकतात. स्पष्टपणे कोणी कोणाचे नाव घेताना दिसत नाही.

भाजपचे प्रदेशाध्यक्ष चंद्रशेखर बावनकुळे यांनी शपथविधीची तारीख जाहीर केली. त्यातही मुख्यमंत्री म्हणून कोण शपथ घेणार आहे, हे त्यांनी सांगितलेले नाही. मध्यंतरी काळजीवाहू मुख्यमंत्री एकनाथ शिंदे नाराज असल्याचे बोलले जात होते. ते गावी गेले होते. यादरम्यान त्यांनी मौनव्रत धारण केले होते. ते मुंबईत परतले आहेत. त्यांनी मोदी आणि शाह जो निर्णय घेतील तो मान्य असल्याचे सांगून आपला मुख्यमंत्रिपदावरचा दावा सोडला असल्याचे दिसून येते.

आता गृहखात्याची अट शिवसेनेने टाकली असल्याचे समोर आले आहे. हे सर्व दबावाचे राजकारण पंतप्रधान नरेंद्र मोदी आणि केंद्रीय गृहमंत्री अमित शाह कसे उलटवून टाकणार, हे येत्या दोन दिवसांत समजले. या सर्व पार्श्वभूमीवर नागपूरमध्ये आणि देवेंद्र फडणवीस यांच्या दक्षिण-पश्चिम विधानसभा मतदारसंघात ‘मी पुन्हा येईल' हा फलक सर्वांचे लक्ष वेधून घेत आहे.

गावांना जलयुक्त करण्यासाठी, शहरांचा चेहरा बदलण्यासाठी, माझ्या महाराष्ट्राला दुष्काळमुक्त करण्यासाठी, माझ्या युवा मित्रांना अधिक सक्षम बनविण्यासाठी, माझ्य बळीराज्याचे हात बळकट करण्यासाठी आणि नवमहाराष्ट्राच्या निर्मितीसाठी... मी परत येईल, असा उल्लेख यावर करण्यात आला आहे. भल्यामोठ्या सभेला पाठमोरे संबोधित करणारा फडणवीस यांचा फोटोही यावर आहे. मात्र फलक कोणी लावले, प्रकाशक कोण, याचा उल्लेख यावर करण्यात आलेला नाही.