Nagpur Election: विधानसभेतली बंडखोरी पडणार महागात! तीन माजी नगरसेवकांना काँग्रेसचा मोठा धक्का

Nagpur Election: विधानसभेच्या निवडणुकीत आपल्याच पक्षाच्या उमेदवाराच्या विरोधात बंडखोरी करणाऱ्या काँग्रेसच्या तीन नगरसेवकांना चांगलेच महागात पडणार असल्याचे दिसून येते. महापालिकेच्या निवडणुकीसाठी या तिघांसाठी काँग्रेसने आपली दारे बंद केली आहेत, त्यांना अर्ज देण्यासही नकार देण्यात आला आहे. आता महापालिकेच्या निवडणुकीत हे नगरसेवक काय भूमिका घेतात याकडे सर्वांचे लक्ष राहणार आहे.

विधानसभेच्या निवडणुकीत माजी मंत्री व उत्तर नागपूरचे आमदार नितीन राऊत यांच्या विरोधात माजी नगरसेवक मनोज सांगोळे यांनी निवडणूक लढवली होती. सांगोळे यांनी त्यावेळी बसपात प्रवेश केला होता, यात त्यांचा पराभव झाला ते अद्याप बसपातच आहेत. आता पुन्हा महापालिकेच्या निवडणुकीसाठी ते काँग्रेसच्या नेत्यांकडे चकरा मारत आहेत. त्यांना उमेदवारी देण्यास नितीन राऊत यांनी कडाडून विरोध केला आहे. विधानसभेच्या निवडणुकीत बंडखोरी करायची आणि महापालिकेच्या निवडणुकीत काँग्रेसकडे हे चालणार नाही असे स्पष्ट नितीन राऊत यांनी सांगोळे यांना बजावले आहे.

पूर्व नागपूर विधानसभा मतदारसंघातून पुरुषोत्तम हजारे यांनीसुद्धा बंडखोरी केली होती. महाविकास आघाडीचे उमेदवार दुनेश्वर पेठे (शरद पवार राष्ट्रवादी काँग्रेस) यांच्या विरोधात त्यांनी निवडणूक लढली होती. विधान परिषदेचे सदस्य व पूर्व नागपूर विधानसभा मतदारसंघाचे दावेदार अभिजित वंजारी यांनी हजारे यांच्या नावावर आक्षेप घेतला आहे. २०२०च्या निवडणुकीत हजारे काँग्रेसचे उमेदवार होते. त्यांनी भाजपचे आमदार कृष्णा खोपडे यांना तगडी फाईट दिली होती. दुसऱ्या क्रमांकाची मते घेतल्यानंतरही उमेदवारी दिली नाही त्यामुळे नाराज झालेल्या हजारे यांनी बंडाचा झेंडा फडकावला होता. विशेष म्हणजे हजारे यांनी निवडणुकीनंतर काँग्रेसमध्ये घरवापसी केली आहे.

पश्चिम नागपूर विधानसभा मतदारसंघात काँग्रेसचे शहर अध्यक्ष व आमदार विकास ठाकरे यांना सातत्याने आव्हान देणारे माजी नगरसेवक कमलेश चौधरी यांनाही उमेदवारी अर्ज देण्यास काँग्रेसने नकार दिला आहे. चौधरी यांनी बंडखोरी केली नाही मात्र ठाकरे आणि त्यांचे राजकीय वैर आहे. ठाकरे यांनी चौधरी यांनी बळकावलेल्या जागेच्या विरोधात मोहीम उघडली आहे. विधानसभेतही अनेकदा प्रश्न उपस्थित केला. चौधरी हे काँग्रेसचे नेते व माजी मंत्री सुनील केदार यांचे समर्थक आहेत. मध्य नागपूर विधानसभा मतदारसंघात काँग्रेसचे उमेदवार बंटी शेळके यांच्या विरोधात बंडखोरी करणाऱ्या रमेश पुणेकर यांना मात्र कोणीच विरोध केला नाही. पुणेकर यांचीसुद्धा काँग्रेसमध्ये वापसी झाली आहे.