Nagpur Municipal Corporation election : अजित पवार यांच्या राष्ट्रवादी काँग्रेसच्यावतीने 'AB फॉर्म' वाटप सुरू असताना नाराज झालेल्या एका इच्छुक व त्याच्या समर्थकाने तोडफोड करून आपला संताप व्यक्त केला.
राष्ट्रवादी कार्यालयातील टीव्ही, तसेच टेबलावरच्या काचा फोडण्यात आल्याने चांगलीच खळबळ उडाली होती. पैसे घेऊन राष्ट्रवादीच्या पदाधिकाऱ्यांनी तिकिटे विकल्याचा आरोप तोडफोड करणाऱ्यांचा आहे.
अजित पवार (Ajit Pawar) यांच्या राष्ट्रवादी काँग्रेसने स्वबळावर लढण्याचे कालच जाहीर केले होते. सोबतच 'AB फॉर्म' सुद्धा वाटप करण्यास सुरुवात केली होती. सोमवारी जवळपास 40 जणांना 'AB फॉर्म' वाटप करण्यात आले होते. आज महाविकास आघाडी आणि भाजप महायुती तुटल्यानंतर राष्ट्रवादीच्या कार्यालयात इच्छुकांची चांगलीच गर्दी वाढली.
भाजपने (BJP) तिकिट कापलेल्या इच्छुकांनाही राष्ट्रवादीने 'AB फॉर्म' दिले. त्यामुळे आधी आश्वासन देऊन डावललेले कार्यकर्ते नाराज झाले. त्यापैकी एकाने कार्यालयात जाऊन आरडाओरड केली आणि टीव्ही फोडला. यावेळी राष्ट्रवादीच्या कार्यालयात शहराचे कार्याध्यक्ष अनिल शिवणकर यांच्यासह काही पदाधिकारी उपस्थित होते. पैसे घेऊन 'AB फॉर्म' दिल्या जात आहे, तिकिटे विकल्या जात आहे, असा आरोप अनेकांनी केला.
अजित पवार यांच्या राष्ट्रवादी काँग्रेसने युती आणि आघाडीच्या सर्व चर्चा बंद करून 'AB फॉर्म' वाटप सुरू केले आहे. हे बघता राष्ट्रवादी काँग्रेस आता स्वबळावरच लढणार असल्याचे स्पष्ट झाले आहे. नागपूर शहरातील 90 जागांवर राष्ट्रवादी उमेदवार उभे करणार आहे. त्यांना आता भाजप, काँग्रेस, शरद पवारांची राष्ट्रवादी आणि दोन्ही सेनेसोबत मुकाबला करावा लागणार आहे.
राष्ट्रवादीची भाजपसोबत जागा वाटपाची बोलणी सुरू होती. राष्ट्रवादी 15 टक्के जागा देण्याची मागणी केली होती. तसा प्रस्ताव भाजपच्या नेत्यांना दिला होता. चार दिवसांपूर्वी नागपूरचे निरीक्षक माजी आमदार राजू जैन यांनी युती होणारच असे ठामपणे सांगितले होते. नागपूरचे नेते काय म्हणतात याकडे लक्ष देऊ नका, जागा वाटपाची बोलणी अजितदादा करणार आहेत. त्यामुळे तुम्ही निश्चिंत राहा, असा सल्लाही देण्यात आला होता.
यानंतर राष्ट्रवादीने सन्मानजनक जागा देण्याची मागणी केली होती. मात्र भाजपने चार ते पाचच जागा देण्याची तयारी दर्शवली असल्याचे सांगण्यात येते. भाजपचा हा प्रस्ताव राष्ट्रवादी काँग्रेसने फेटाळून लावला आहे. त्यापेक्षा आपल्या बळावर निवडणूक लढण्याचा निर्णय घेतला आहे. उमेदवारी अर्ज भरण्यासाठी दोनच दिवसांचा कालावधी शिल्लक राहिली आहे. हे बघून आता युती आणि आघाडीच्या चर्चा बंद करून निवडणूक रिंगणात आपले कार्यकर्ते उतरवल्या जाणार आहे. सोमवारी दुपारपर्यंत सुमारे 60 इच्छुकांना पक्षाच्यावतीने एबी फॉर्मचे वाटप करण्यात आले.
राष्ट्रवादीकडे आभा पांडे, तानाजी वनवे, राजेश माटे हे माजी नगरसेवक आहेत. या सर्वांना 'AB फॉर्म' देण्यात आला आहे. आभा पांडे या मागील निवडणुकीत अपक्ष तर तानाजी वनवे हे काँग्रेसमधून निवडून आले होते. वनवे यांच्याच प्रचारसभेत मोठा राडा झाला होता.
तत्कालीन काँग्रेसचे प्रदेशाध्यक्ष सतीश अशोक चव्हाण यांच्यावर अंडी व शाई फेकण्यात आली होती. त्यानंतरही वनवे निवडून आले होते. त्यानंतर काँग्रेसचे शहराध्यक्ष आमदार विकास ठाकरे यांच्यासोबत त्यांचे खटकले. महापालिकेचा कार्यकाळ संपल्यानंतर वनवे यांनी राष्ट्रवादीचा पर्याय निवडला. आता त्यांना भाजप, काँग्रेस या बलाढ्य पक्षासोबत दोन हात करावे लागणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.