Nagpur Winter Session: मुख्यमंत्री शिंदेंचं रेशीमबागेत हेडगेवारांच्या स्मृतिस्थळाला अभिवादन

Nagpur News : मुख्यमंत्री एकनाथ शिंदे यांनी आज रेशीमबागेत जाऊन राष्ट्रीय स्वयंसेवक संघाचे संस्थापक डॉ. हेडगेवार यांच्या स्मृतिस्थळाला अभिवादन केले. त्यानंतर हेडगेवार यांच्या दर्शनाने ऊर्जा आणि प्रेरणा मिळते, अशी प्रतिक्रियाही मुख्यमंत्री शिंदे यांनी माध्यमांशी बोलताना दिली.

'नागपूरमध्ये हिवाळी अधिवेशन असताना दरवर्षी रेशीमबागेत येऊन डॉ. हेडगेवार यांच्या स्मृतिस्थळाचे दर्शन घेतो. येथे आल्यावर ऊर्जा मिळते. येथे येण्यामध्ये आणि हिंदुत्वाच्या मुद्द्यांमध्ये काहीच राजकरण नाही. आमचे हिंदुत्व हे विकासाचे हिंदुत्व आहे. आम्ही सर्वांना बरोबर घेऊन काम करत आहोत', असे शिंदे म्हणाले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

'आमचे सरकार सर्वसामान्य माणसाचे सरकार आहे. सर्वसामान्य माणूस कधीही मुख्यमंत्र्यांना भेटू शकतो, असे आमचे सरकार आहे. जनतेच्या सेवेची प्रेरणा येथून घेऊन काम करत आहोत. आम्ही देशाला काय देणार, हा विचार डॉ. हेडगेवार यांनी दिला', असेही मुख्यमंत्री शिंदे (Eknath Shinde) म्हणाले.

दरम्यान, रेशीमबाग येथील डॉ. हेडगेवार स्मृतिभवन परिसराला भेट देताना त्यांच्याबरोबर शिवसेना (शिंदे गट) आमदार भरत गोगावले यांच्यासह अनेक नेते होते. तत्पूर्वी भाजपच्या सर्व आमदारांनी रेशीमबागेत जाऊन स्मृती मंदिर परिसरात डॉ. हेडगेवार आणि गोळवलकर गुरुजी यांच्या समाधीचे दर्शन घेतले होते.

(Edited by- Ganesh Thombare)