PM Modi Nagpur Visit : PM मोदींच्या दौऱ्याआधी हिंदूंना एकीचा संदेश देणारे बॅनर्स; संघ अन् भाजपच्या मनात नेमकं काय? चर्चांना उधाण

Nagpur News, 30 Mar : पंतप्रधान नरेंद्र मोदी (Narendra Modi) रविवारी (ता.30) गुढीपाडव्याच्या मुहूर्तावर नागपूर दौऱ्यावर येणार आहेत. या दौऱ्यादरम्यान ते राष्ट्रीय स्वयंसेवक संघाचं मुख्यालय असलेल्या रेशीमबाग येथील डॉ. हेडगेवार स्मृती भवनाला भेट देणार आहेत.

तसंच यावेळी ते दीक्षाभूमीला देखील भेट देणार आहेत. या दौऱ्यात मोदींच्या हस्ते माधव नेत्रालयमधील नव्या इमारतीचा भूमिपूजन सोहळा पार पडणार आहे. आरएसएसचे शताब्दी वर्ष सुरु असल्यामुळे मोदींचा हा दौरा विशेष मानला जात आहे.

शिवाय या दौऱ्यात संपूर्ण वेळ सरसंघचालक मोहन भागवत हे मोदींसोबत असणार आहेत. तर नुकत्याच झालेल्या नागपुरातील हिंसाचारच्या घटनेनंतर पंतप्रधान नागपुरात येत असल्यामुळे कडेकोट बंदोबस्त तैनात करण्यात आला आहे.

तर दुसरीकडे भाजपकडून मोदींच्या स्वागतासाठी लावण्यात आलेल्या बॅनर्सवरती 'एक है तो सेफ है' हा महाराष्ट्र विधानसभा निवडणुकीत मोदींनी दिलेला नारा लिहिल्याचं दिसत आहे. या निवडणुकीत लोकांनी भाजपला (BJP) भरभरून मतदान केलं. त्यानंतर राज्यात बहुमताचं सरकार स्थापन झालं आहे.

त्यामुळे आता मोदी नागपुरात येत असताना बॅरनवर लिहिलेली 'एक है तो सेफ है' ची घोषणा सर्वांच लक्ष वेधून घेत आहे. या घोषणेची सध्या मोठ्या प्रमाणात चर्चा सुरू आहे. संघ मुख्यालयातील भेट आणि हे बॅनर्स आणि हिंदू नववर्षाच्या मुहूर्तावर भाजप आणि संघ पुढील नेमकी काय रणनीती ठरवणार आहे याबाबतच्या चर्चांना उधाण आलं आहे.

२५ वर्षे पूर्ण करणारा ई-सकाळ आता का्ॅमस्कोअरमध्ये नंबर १. डिजिटल माध्यमांच्या क्षेत्रातली नवी झेप