मंत्रि‍पदासाठी जॅकेट शिवले होते; आता दिवाळीला वापरायला काढले : CM फडणवीसांच्या जवळच्या आमदाराने हसत सांगितलं दुःख

Ravi Rana News : मी मंत्रिपदासाठी अनेक जॅकेट शिवले होते. पण आता ते दिवाळी आणि दसऱ्याला वापरायला काढले आहेत, अशी खंत अगदी हसत हसत अमरावती जिल्ह्यातील बडनेरा मतदारसंघाचे आमदार रवी राणा यांनी बोलून दाखवली. ते दिवाळीनिमित्त हनुमानगढी येथील दीपोत्सवानंतर माध्यमांशी संवाद साधत होते.

रवी राणा नेहमी पांढरा खादीचा कुर्ता आणि पांढरा पायजमा अशा पोषाखात असतात. राणा यांनी त्यावर गुलाबी जॅकेटही घातले होते. या वेगळेपणाबद्दल पत्रकारांनी राणा यांना विचारले. यावर त्यांनी हसत हसत उत्तर दिले. मुख्यमंत्री देवेंद्र फडणवीस यांचे निकटवर्तीय आमदार म्हणून राणा यांची ओळख आहे.

रवी राणा म्हणाले, मी अनेक जॅकेट्स शिवून ठेवले होते. मला असा विश्वास होता की मी मंत्री बनणार आहे. पण ते जॅकेट्स पडून होते. मला असे वाटले की ते दिवाळी, दसऱ्याला घातले पाहिजेत. म्हणून जॅकेट घातले आहे. त्यात गुलाबी आहे, निळे आहे, हिरवे आहे, लाल अशा सगळ्याच कलरचे जॅकेट आहेत.

अजित पवार यांनी गुलाबी जॅकेट घातले म्हणून मी घातले असे नाही. अजित पवार उपमुख्यमंत्री झाले, ते जॅकेट त्यांना घालावेच लागते. मी बनणार होतो म्हणून मी शिवले होते. पण तसेच पडले होते, असेही त्यांनी सांगितले. राणा यांच्या या प्रतिक्रियेवर त्यांच्या पत्नी, माजी खासदार नवनीत राणा यांनीही 'समुंदर को गम है, पर ना बता सकता है, ना रो सकता है' अशी खंत व्यक्त केली.

रवी राणा हे अमरावती जिल्ह्यातील बडनेरा मतदारसंघाचे युवा स्वाभिमान पक्षाचे आमदार आहेत. अमरावती जिल्ह्यात दर्यापूर वगळता सर्व सात विधानसभा मतदारसंघात महायुतीचे आमदार निवडून आले आहेत. यातही रवी राणा, भाजपचे प्रताप अडसड आणि अमरावती शहरच्या राष्ट्रवादी काँग्रेसच्या सुलभा खोडके हे अनुभवी आमदार आहेत. पण यातील एकाही आमदाराला मंत्रिपद मिळालेले नाही.