Yavatmal Congress : पक्षविरोधी कारवाया केल्याचा आरोप असलेल्या महिला नेत्याचीच प्रदेशाध्यक्षपदी नियुक्ती; काँग्रेसमधील असंतोष पुन्हा उफाळला

Yavatmal News, 23 Oct : संध्या सव्वालाखे यांची पुन्हा महिला काँग्रेसच्या प्रदेशाध्यक्षपदी नियुक्ती करण्यात आली आहे. विधानसभेच्या निवडणुकीत काँग्रेसच्या उमेदवारांनी पक्षविरोधी कारवाया केल्याचा आरोप सव्वालाखे यांच्यावर केला होता.

त्यांना पक्षातून काढून टाकण्याची मागणी केली होती. असे असताना पुन्हा त्यांची फेरनियुक्ती करण्यात आल्याने यवतमाळ जिल्हा काँग्रेसमध्ये मोठा असंतोष उफाळून आला आहे. नाना पटोले प्रदेशाध्यक्ष असताना सव्वालाखे यांना महिला काँग्रेसचे प्रदेशाध्यक्ष करण्यात आले होते.

विधानसभेच्या निवडणुकीत दारुण पराभव झाल्यानंतर पटोले यांनी राजीनामा द्यावा लागला होता. त्यानंतर सर्वच आघाड्यांच्या कार्यकारिणी बरखास्त करण्यात आल्या होत्या. त्यात महिला काँग्रेसच्या कार्यकारिणीचाही समावेश होता. संध्या सव्वालाखे यांनाही विधानसभेच्या तिकीट हवे होते. तशी फिल्डिंग त्यांनी लावली होती.

मात्र त्यांच्या मतदारसंघात आमदार बाळासाहेब मांगुळकर यांचा दावा भक्कम होता. मागच्या निवडणुकीत ते अवघ्या काही मतांनी पराभूत झाले होते. काँग्रेसने उमेदवारी देताना मागील निवडणुकीची आकडेवारी समोर ठेवली होती. त्यामुळे सव्वालाखे यांना मांगुळकर यांचा पत्ता कापता आला नाही.

मांगुळकर यांनी आपली उमेदवारी सार्थ ठरवली. मागील निवडणुकीतील पराभवचा वचपा काढला. मात्र यवतमाळ जिल्ह्यातील इतर उमेदवारांना पराभवाला सामोरे जावे लागले. निवडणूक आटोपल्यानंतर सव्वालाखे यांच्या विरोधात असंतोष उफाळून आला होता. त्याच त्या उमेदवारांना तिकीट दिले जात असल्याने दुसऱ्या फळीतील काँग्रेसचे कार्यकर्ते आक्रमक झाले होते.

काँग्रेस विद्यमान अध्यक्ष हर्षवर्धन सपकाळ यांनी माजी मंत्री सुनील केदार यांची निरीक्षक म्हणून नियुक्ती केली. त्यांना यवतमाळला पाठवून कार्यकर्त्यांचे म्हणणे ऐकून घेण्यास सांगितले होते. या बैठकी बऱ्याच काँग्रेसचे नेते व कार्यकर्त्यांनी सव्वालाखे यांनी भाजपला मदत केली, त्यामुळे त्यांना पक्षातून काढून टाकण्याची मागणी केली होती.

यात आमदार मांगुळकर आघाडीवर होते. असंतोष व्यक्त करणारे नाना पटोले यांचे कट्टर समर्थक देवानंद पवार आता भाजपमध्ये गेलेत. प्रवीण देशमुख हे अजितदादांच्या राष्ट्रवादी काँग्रेसमध्ये लवकरच सहभागी होणार आहेत. त्यांच्यासोबत दुसऱ्या फळीतील अनेक युवा कार्यकर्तेसुद्धा काँग्रेस सोडून जात आहेत. असे असताना काँग्रेसने पुन्हा सव्वालाखे यांनी महिला काँग्रेसच्या प्रदेशाध्यक्षपदी नियुक्ती केली. त्यामुळे आणखी वातावरण तापले आहे.