Ramtek Congress : पक्षविरोधी काम करणं भोवलं; रामटेकमधील काँग्रेसच्या सहा पदाधिकाऱ्यांची हकालपट्टी

Nagpur, 01 August : लोकसभा निवडणुकीत काँग्रेस पक्षाच्या विरोधात काम करणं, हे रामटेक लोकसभा मतदारसंघातील पक्षाच्या पदाधिकाऱ्यांच्या चांंगलंच अंगलट आलं आहे.

काँग्रेस उमेदवाराच्या विरोधात काम केल्याचा ठपका ठेवत कुही शहराचे अध्यक्ष, उपाध्यक्षांसह सहा पदाधिकाऱ्यांची सहा वर्षांसाठी पक्षातून हकालपट्टी करण्यात आली आहे, त्यामुळे पक्षाच्या विरोधात भूमिका घेणाऱ्याच्या विरोधात काँग्रेसने कडक भूमिका घेतली आहे.

रामटेक लोकसभा मतदारसंघात येणाऱ्या कुही शहर काँग्रेस (Congress) समितीचे अध्यक्ष विलास राघोर्ते, हर्षा इंदूरकर, उपाध्यक्ष अमित ठाकरे, नगरसेवक रुपेश मेश्राम, मयूर तळेकर आणि निशा घुमरे या पदाधिकाऱ्यांची सहा वर्षांसाठी काँग्रेस पक्षातून हकालपट्टी करण्यात आली आहे. प्रदेश काँग्रेसने बंडखोरांच्या विरोधात कडक भूमिका घेतल्याचे दिसून येत आहे.

लोकसभा निवडणुकीत काँग्रेसचे आमदार राजू पारवे यांनी एकनाथ शिंदे यांच्या शिवसेनेत प्रवेश करून निवडणूक लढवली होती. त्या निवडणुकीत कुही शहर काँग्रेस समितीचे अध्यक्ष विलास राघोर्ते यांच्यासह पक्षाच्या पदाधिकाऱ्यांनी बंडखोरी करत काँग्रेस पक्षाचे अधिकृत उमेदवाराच्या विरोधात काम केले हेाते.

रामटेक लोकसभा मतदारसंघात महायुतीकडून शिवसेना एकनाथ शिंदे गटाचे राजू पारवे यांनी, तर महाविकास आघाडीकडून काँग्रेसचे श्यामकुमार बर्वे यांनी निवडणूक लढवली होती. त्यात निवडणुकीत काँग्रेसचे श्यामकुमार वर्बे यांनी विजय मिळविला आहे.

मात्र, काँग्रेस पक्षाच्या अधिकृत उमेदवाराच्या विरोधात भूमिका घेणं कुही शहरातील काँग्रेस पक्षाच्या पदाधिकाऱ्यांच्या विरेाधात चांगलंच अंगलट आलं आहे.

कुही शहरातील काँग्रेस पदाधिकाऱ्यांनी पक्षाच्या उमेदवाराच्या विरोधात काम केल्याचा ठपका या सहा जणांच्या विरोधात ठेवण्यात आला होता. त्याबाबतचा अहवाल काँग्रेसचे जिल्हाध्यक्ष राजू मुळक यांनी प्रदेशाध्यक्ष नाना पटोले यांच्याकडे पाठवला होता. त्यानंतर प्रदेशाध्यक्ष पटोले यांनी या सहा पदाधिकाऱ्यांवर निलंबनाची ही कारवाई केली आहे.