Gondia Navratri Clash: गोंदियात ऐन नवरात्रौत्सवातच वाद पेटला; उद्धव ठाकरे अन् अजितदादांच्या जिल्हाध्यक्षांमध्ये तुफान राडा

Gondia News: गोंदिया जिल्ह्यात उद्धव बाळासाहेब ठाकरे आणि अजित पवार यांच्या राष्ट्रवादी काँग्रेसच्या जिल्हाध्यक्षांमध्ये देवीच्या दर्शनावरून मोठा वाद झाला. दोन्ही अध्यक्ष आणि त्यांचे समर्थक एकमेकांशी भिडल्याने मोठा तणाव निर्माण झाला होता. पण पोलिसांनी लगेच हस्तक्षेप करून वाद संपुष्टात आणला. यादव यांची पार्श्वभूमी लक्षात घेता हा वाद आणखी वाढणार असल्याची शक्यता वर्तवली जात आहे.

उद्धव ठाकरे शिवसेनेचे (Uddhav Thackeray Shivsena) जिल्हाध्यक्ष पंकज यादव हे आपल्या कार्यकर्त्यांसह मामा चौकातील देवीच्या दर्शनासाठी गेले होते. मात्र, राष्ट्रवादी काँग्रेसच्या एका कार्यकर्त्याने त्यांना रोखले. तुम्हाला दर्शन करता येणार नाही असे सांगताच त्यांचे समर्थक चिडले. त्यांनी गोंधळ घालण्यास सुरुवात केली. खुर्च्यांची फेकाफेक केली.

हा प्रकार होत असतानाच राष्ट्रवादी काँग्रेसचे (NCP) जिल्हाध्यक्ष नानू मुदलियार आपल्या समर्थकांसह तेथे धावून आले. त्यामुळे वाद आणखीच वाढला. दोघांचेही समर्थक आपसात भिडल्याने मोठा तणावाची स्थिती निर्माण झाली होती. मात्र, पोलिस वेळीच दाखल झाले आणि दोन्ही गटाची समजूत काढली. धार्मिक वाद निर्माण होऊ नये याची काळजी घेतली. त्यामुळे तणाव निवळला.

उद्धव ठाकरे शिवसेनेचे जिल्हाध्यक्ष पंकज यादव यांची पार्श्वभूमी लक्षात घेता भविष्यात यावरून पुन्हा वाद निर्माण होण्याची शक्यता वर्तविली जात आहे. गोंदिया पालिका आणि जिल्हा परिषदेच्या निवडणुकीत पुन्हा या वादाने डोके वर काढू नये याची काळजी दोन्ही राजकीय पक्षांना घ्यावी लागणार आहे.

विशेष म्हणजे कालच राष्ट्रवादी काँग्रेसचे राष्ट्रीय कार्याध्यक्ष प्रफुल पटेल गोंदियात होते. त्यांनी स्थानिक निवडणुका स्वबळावर लढणार असल्याचे जाहीर केले. हे बघता सर्वच पक्ष आपसांत भिडणार असल्याचे दिसून येते.