Sikandar Sheikh Arrested : अटकेत असलेल्या सिकंदर शेखसाठी रोहित पवार मैदानात! सुप्रिया सुळेंच्या माध्यमातून पंजाब सरकारशी बोलणी...

Rohit Pawar News : 2024 मध्ये मानाची महाराष्ट्र केसरीची गदा पटकावणार पैलवान सिंकदर शेख याला अवैध शस्त्र तस्कीर प्रकरणात पंजाब पोलिसांनी अटक केली आहे. राजस्थानमधील गुर्जर टोळीशी त्याचा संपर्क असल्याचा दावा पंजाब पोलिसांनी केला आहे. दरम्यान, सिकंदर शेखच्या कुटुंबीयांनी आपल्या मुलाला अडकवले जात असल्याचा आरोप केला. या प्रकरणात आता राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी उडी घेतली आहे.

रोहित पवार यांनी ट्विट करत म्हटले आहे की, 'पै. सिकंदर शेख हा एक गुणी पैलवान असून त्याने आतापर्यंत केवळ त्याच्या गुणवत्तेवरच कुस्ती क्षेत्रात स्वतःचं असं एक स्वतंत्र स्थान निर्माण केलं. कुस्ती सोडून गुन्हेगारी क्षेत्रात तो जाईल, यावर आमचा बिलकूल विश्वास नाही, कदाचित कुस्तीमध्ये त्याची होत असलेली प्रगती पाहून कुणीतरी त्याला जाणीवपूर्वक अडकवण्याचा प्रयत्न केला असू शकतो.'

'महाराष्ट्र सरकारने पंजाब सरकारशी बोलून सिकंदरवर कोणताही अन्याय होणार नाही, याची काळजी घ्यावी. अन्यथा चुकीच्या पद्धतीने त्याला अडकवल्यास लंबी रेस का घोडा असलेल्या एका मराठी पैलवानावर अन्याय करणारं ठरेल. यासंदर्भात खासदार सुप्रियाताईंच्या माध्यमातून पंजाब सरकारशी बोलण्याचा प्रयत्न सुरु असून यातून सकारात्मक मार्ग निघेल', असा विश्वास देखील रोहित पवार यांनी व्यक्त केला आहे.

भाजपची भूमिका काय?

भाजप आमदार प्रवीण दरेकर यांनी सिंकदर शेखच्या अटकेवर बोलताना म्हणाले, 'या प्रकरणावर आम्ही भाष्य करण्यापेक्षा वस्तुस्थिती काय असेल याची दखल पोलिस घेतील. त्यामध्ये सत्य असेल तर कायद्यासमोर सगळे समान आहेत. योग्य ती कारवाई होईल. जर कोणी गोवण्याचा प्रयत्न केला तर अशा प्रकारे एका खेळाडूला गोवू नये, अशा पद्धतीची आमची स्पष्ट भूमिका आहे.'