Free Treatment In Government Hospital: राज्य सरकारचा मोठा निर्णय; आता सर्व सरकारी हॉस्पिटलमध्ये मोफत उपचार मिळणार

Mumbai News: राज्यातील सर्व सार्वजनिक हॉस्पिटलमध्ये आता मोफत उपचार देण्याचा महत्वाचा निर्णय राज्य सरकारने घेतला आहे. गुरूवारी झालेल्या मंत्रिमंडळाच्या बैठकीत एकमताने हा निर्णय घेण्यात आला.

गरीब, गरजू रुग्णांना या निर्णयामुळे मोठा दिलासा मिळणार आहे. प्राथमिक आरोग्य केंद्र, ग्रामीण रुग्णालय, स्त्री रुग्णालय, जिल्हा सामान्य रुग्णालय, उपजिल्हा रुग्णालय अशा सर्व रुग्णालयांत यापुढे मोफत उपचार मिळणार आहे.

सार्वजनिक आरोग्य विभागाच्या सर्व हॉस्पिटलमध्ये मोफत उपचार देण्यात यावेत, अशी मागणी गेल्या अनेक दिवसांपासून करण्यात येत होती. अखेर या मागणीला यश आले असून यापुढे सार्वजनिक आरोग्य विभागाच्या सर्व हॉस्पिटलमध्ये मोफत उपचार दिले जाणार आहेत. राज्यातील सार्वजनिक आरोग्य विभागाच्या एकूण २४१८ संस्था असून या सर्व हॉस्पिटलमध्ये वर्षभरात उपचार घेण्यासाठी तब्बल २.५५ कोटी नागरिक येतात.

यामध्ये नाशिक आणि अमरावती येथील कॅन्सर हॉस्पिटलचाही समावेश करण्यात आला असून आता येथेही मोफत उपचार मिळणार आहेत. आज झालेल्या मंत्रिमंडळाच्या बैठकीत एकमताने हा निर्णय घेण्यात आला असून राज्यातील गोरगरीब आणि गरजू रुग्णांना लाभ मिळणार आहे.

Edited By- Ganesh Thombare