Mumbai News, 15 Jul : उपमुख्यमंत्री एकनाथ शिंदेंच्या शिवसेनेचे आमदार संजय गायकवाड यांनी केलेल्या राड्यानंतर आकाशवाणी आमदार निवास कॅन्टीनमधील स्वच्छते संदर्भातील अनेक प्रश्न उपस्थित झाले होते. त्यानंतर या कॅन्टीचा परवाना रद्द करण्यात आला होता.
अशातच आता चार दिवसांपासून बंद असलेले आकाशवाणी आमदार निवास येथील कॅन्टीन आज मंगळवारपासून (ता.15) सुरू करण्यात आलं आहे. हे कॅन्टीन चालवण्याची परवानगी अजंता केटरर्सला विधिमंडळाकडून मिळाल्याची माहिती समोर आली आहे.
मात्र, या परवानगीवरून अजित पवारांच्या राष्ट्रवादीचे आमदार अमोल मिटकरी आक्रमक झाले आहेत. या कॅन्टीनला परवानगी कशी दिली? असा प्रश्न त्यांनी उपस्थित केला आहे. शिवाय आपण सर्व लोक मराठी माणसांबद्दल एवढं प्रेम दाखवत असतो. त्यामुळे या कॅन्टीनचं कंत्राट मराठी माणसाला किंवा बचत गटाला मिळावं अशी आपली भूमिका असल्याचंही मिटकरींनी म्हटलं आहे.
आमदा निवासमधील कॅन्टीला लगेच मिळालेल्या परवानगीवर प्रतिक्रिया देताना अमोल मिटकरी म्हणाले, "आमदार निवासातील कॅन्टीनची अवस्था पाहिली तर त्याला पुन्हा परवानगी दिली कशी हाच मोठा प्रश्न आहे. आपण मराठी माणसाबद्दल एवढं प्रेम दाखवत असतो. पण हेच कॅन्टीनचं कंत्राट मराठी माणसाला किंवा बचत गटाला मिळावी अशी माझी भूमिका होती.
मुळात माझा कंत्राट देण्याला विरोध आहे. आकाशवाणी किंवा आमदार निवासातील कॅन्टीमध्ये ज्या पद्धतीने बाहेरच्या लोकांना कंत्राट दिलं जात आणि ते लोक कसे वागतात याबाबत एक शोध मोहीमंच राबवली पाहिजे.", असं म्हणत त्यांनी परप्रांतीयांना कंत्राट देण्यावरून नाराजी दर्शवली आहे. शिवाय परवानगी देण्यावरून देखील प्रश्न उपस्थित केला आहे.
दरम्यान, कॅन्टीनला परवानगी का दिली याचा खुलासा गृह राज्यमंत्री पंकज भोयर यांनी केला आहे. सध्या अधिवेशन सुरू असल्याने अनेक लोक येतात त्यांच्या जेवणाची सोय व्हावी यासाठी कॅन्टीन सुरु ठेवण्यात आलं आहे. परंतु त्याच्यावर कारवाई निश्चित केली जाईल, असं आश्वासन भोयर यांनी दिलं.
शिवेसना आमदार संजय गायकवाड यांनी आमदार निवास कॅन्टीनमध्ये निकृष्ट दर्जाचं जेवण दिल्याची तक्रार करत एका कर्मचाऱ्याला बेदम मारहाण केली होती. त्यानंतर अन्न व औषध प्रशासनाच्या (FDA) तपासणीत कॅन्टीनमध्ये स्वच्छतेचा अभाव आढळून आला. त्यानंतर अजंता केटरर्सचा परवाना रद्द करण्यात आल्यामुळे कॅन्टीन बंद करण्यात आलं होतं. मात्र, आज सकाळपासून हे कॅन्टीन पुन्हा सुरू करण्यात आलं आहे. त्यामुळे अनेकांनी कॅन्टीला परवानगी देण्यावरून प्रश्न उपस्थित केले आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.