NCP Crisis And Congress : महाराष्ट्राच्या राजकारणात रविवारी (दि.२ जुलै) मोठी उलथापालथ झाली. राष्ट्रवादीत उभी फूट पडून विरोधी पक्षनेते असलेले अजित पवार हे शिंदे-फडणवीस सरकारमध्ये सहभागी झाले. अजितदादांसह प्रफुल्ल पटेल, छगन भुजबळ, सुनील तटकरे यांच्यासह दिलीप वळसे पाटील, धनंजय मुंडे असा मोठा गट आहे. राष्ट्रवादीचे निष्ठावंत आणि कट्टर कार्यकर्ते म्हणवून घेणाऱ्यांनीच बंड केले. यामुळे शरद पवारांसाठी मोठा धक्का मानला जात आहे. (Latest Political News)
दरम्यान, गेल्या वर्षी शिवसेनेत फूट पडून राज्यात महाविकास आघाडीचे सरकार जाऊन शिंदे-फडणवीस सरकार आले होते. वर्षभरानंतर भाजपच्या गळाला राष्ट्रवादी काँग्रेसचे अजित पवार लागले. अजित पवार यांनी बंड करून थेट उपमुख्यमंत्री पदाची शपथ घेतली. तसेच राष्ट्रवादी काँग्रेसमधून आलेल्या इतर आठ आमदारांनीही मंत्रिपदाची शपथ घेतली. दोन मिशन यशस्वी केल्यानंतर आता तिसरे मिशन काँग्रेस असल्याची चर्चा राजकीय वर्तुळात सुरू झाली आहे.
काँग्रेसबाबत मुख्यमंत्री एकनाथ शिंदे यांनी स्पष्ट मत व्यक्त केले आहे. ते प्रसारमाध्यमांशी बोलत होते. यावेळी त्यांना आले तर काँग्रेसमधील आमदारांना सरकारमध्ये सामावून घेणार का, असा प्रश्न विचारण्यात आला. त्यावर मुख्यमंत्री शिंदे यांनी मिश्किल टिप्पणी केली. शिंदे म्हणाले, "आता सरकारमधील सर्व जागा फुल्ल झाल्या आहेत. तसेच मॅजिक फिगरही आता ओलांडली आहे."
राज्य सरकारमध्ये अजित पवार यांनी 'एन्ट्री' केल्यानंतर मंत्रिमंडळ विस्तारही करण्यात आला. त्यानंतर पुन्हा एकदा विस्तार करणार असल्याचे संकेत मुख्यमंत्री एकनाथ शिंदे यांनी दिलेले आहेत. राज्यात सध्या दोन उपमुख्यमंत्री तर शिवसेना, भाजप आणि राष्ट्रवादी काँग्रेसचे प्रत्येकी नऊ असे २७ मंत्री आहेत.
दरम्यान, राष्ट्रवादी काँग्रेसच्या फुटीनंतर काँग्रेसने बुधवारी (ता. ४) महत्वाच्या बैठकीचे आयोजन केले आहे. या बैठकीत काँग्रेसचे राज्यातील संख्याबळ आजमावले जाणार आहे. त्यानंतर रिक्त झालेल्या विरोधी पक्षनेते पदावर काँग्रेस दावा ठोकण्याची शक्यता आहे. महाविकास आघाडीला अजित पवार यांच्या रुपाने मिळालेल्या धक्क्यानंतर काँग्रेसनेही सावध पावले उचलण्यास सुरुवात केली आहे. त्यामुळे काँग्रेसच्या आजच्या बैठकीकडे सर्वांचे लक्ष लागले आहे.
(Edited by Sunil Dhumal)
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.