Anjali Damania: कबूतरखाना वादात अंजली दमानियांची एन्ट्री; केली 'ही' मोठी मागणी

Anjali Damania Speaks on Kabutarkhana: दादर येथील कबूतरखाना हटवण्यावरुन निर्माण झालेला वाद आता चिघळला आहे. एकीकडं कोर्टाचे हटवण्याचे आदेश आहेत तर दुसरीकडं जैन समाज न हटवण्यावर ठाम आहे. या वादात आता समाजिक कार्यकर्त्या अंजली दमानिया यांची एन्ट्री झाली आहे. याप्रकरणावर भाष्य करताना त्यांनी जैन समाजाकडं मोठी मागणी केली आहे.

दमानिया काय म्हणाल्या?

कबूतरखान्याच्या वादावर अंजली दमानिया म्हणाल्या, "जैन समाजातील चेस्ट फिजिशियन डॉक्टर्सनं आपल्या समाजाला समजावण्याचा प्रयत्न करावा. हे जर सरकारकडून घडवण्यात आलं तर अतिउत्तम होईल. कबुतरांच्या विष्ठेमुळं बॅक्टेरियल फंगल इन्फेक्शन रेस्पिरेटी डिसॉर्डर हे आजार होतात. हे जर त्यांच्या समाजाच्या डॉक्टरनंज जैन मुनींना समजावलं तर बरं होईल. उगाच वाद निर्माण करण्यात काहीही फायदा नाही. सध्याच्या घडीला या सगळ्या गोष्टी जैन समाजाला समजावल्या पाहिजेत. काही प्रथा रूढी या जर माणसाच्या जीवाला घातक ठरत असतील तर त्या थांबवायला हव्यात, ही समज त्यांना जर व्यवस्थितपणे दिली तर हा वाद नक्कीच मिटेल"

वाद नेमका काय?

दरम्यान, आरोग्याचे गंभीर प्रश्न निर्माण होत असल्यानं मुंबई हायकोर्टानं मुंबईतील सर्व कबूतरखाने हटवण्याचे आदेश दिले आहेत. त्यानुसार, मुंबई महापालिकेनं दादर इथल्या कबूतरखान्याचं स्ट्रक्चर काढण्यास सुरुवात करण्यात आली होती. पण याला स्थानिक जैन समाजाच्या लोकांनी विरोध केला आहे. कबूतरांना दाणे टाकणं हा आमचा धार्मिक विषय असल्याचं या समाजाच्या लोकांचं म्हणण आहे.

जैन समाज आक्रमक

कोर्टाच्या आदेशानुसार मुंबई महापालिकेनं दादरसह मुंबईतील कबूतरखाने बंद करण्याचा निर्णय घेतला. त्यासाठी कबुतरखान्याच्या बांधकामावर ताडपत्री टाकून तो झाकून टाकण्यात आला. पण जैन समाजानं या ताडपत्रीची हटवली आणि तो पुन्हा खुला करण्याचा प्रयत्न केला. त्यानंतर जैन मुनी निलेशचंद्र विजय यांनी या प्रश्नावर भाष्य करताना प्रक्षोभक विधान केलं आणि नंतर मागेही घेतलं. "आम्ही भारताचं संविधान आणि कोर्टाला मानतो. देवेंद्र फडणवीस यांनाही मानतो, पण आमच्या धर्माच्या विरोधात काही आलं तर आम्ही कोर्टालाही मानणार नाही" असं विधान त्यांनी केलं. त्यामुळं त्यांना मोठ्या टीकेला सामोरं जावं लागलं. अद्यापही हा वाद पूर्णपणे मिटलेला नाही.