Maharashtra Politics : अमित शहांच्या मर्जीतील भाजप नेत्याचे मोठे भाकित; ‘विधानसभेला कदाचित वेगळं चित्र असूही शकतं’

Mumbai, 20 May : मुंबईकर हे आज नरेंद्र मोदींसाठीच मतदान करत आहेत. मतदान केलेल्या दहापैकी आठ लोकही तेच (आम्ही मोदींसाठी मतदान केले) बोलतात. विधानसभेला लोकांच्या मनात कदाचित वेगळं चित्र असूही शकतं. मला माहित नाही की, त्यावेळी काय चित्र असेल. पण, आजतरी मोदींसाठी मतदान होत आहे, असा दावा भारतीय जनता पक्षाचे राष्ट्रीय सरचिटणीस विनोद तावडे यांनी केला.

विनोद तावडे (Vinod Tawde) यांनी मुंबईतील ()Mumbai पार्ले विभागातील साठे महाविद्यालयातील मतदान केंद्रावर सहकुटुंब मतदान केले. त्यानंतर माध्यमाशी बोलताना त्यांना उद्धव ठाकरे (Uddhav Thackeray) यांनी मुंबईतील सहाच्या सहा जागा महाविकास आघाडी (Mahavikas Aghadi) जिंकेल, असा दावा केला आहे, असा प्रश्न विचारण्यात आला. त्यावर उत्तर देताना तावडे यांनी हे विधान केले. तावडे हे बोलण्याच्या ओघात बोलून गेले. पण त्याचे वेगवेगळे अर्थ राजकीय वर्तुळातून काढले जात आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

लोकसभा निवडणुकीच्या पाचव्या टप्याचे आम्ही जे विश्लेषण केले आहे, त्यानुसार एनडीए ‘चारशे पार’ चा आकडा नक्की पार करेल, असा दावा तावडे यांनी केला. इंडिया आघाडीच्या पंतप्रधान पदाच्या दाव्यावर बोलताना तावडे म्हणाले, त्यांनी तसा दावा केला नाही तर त्यांना पोलिंग एजंटही मिळणार नाहीत. त्यांनी दावा करणे स्वाभाविक आहे.

तावडे म्हणाले, संजय राऊत ज्येष्ठ नेते, खासदार आणि एका दैनिकाचे संपादक आहेत. त्यांनी तर आपला तोल ढळू दिला नाही पाहिजे. एकट्या उद्धव ठाकरेंची रांगेत उभे राहून मतदान केले नाही तर नरेंद्र मोदी, शरद पवारही रांगेत उभे होते. लोकशाहीचे एक वैशिष्ट्य आहे की, कोणी कितीही मोठा असला तरी सगळ्यांच्या मताची किमत सारखीच आहे.

दोन दिवसांच्या सुटीनंतर सोमवारी मतदान होत आहे, त्यामुळे लोक कुठेतरी थंड हवेच्या ठिकाणी फिरायला जातील, असं वाटत असताना मतदार मोठ्या संख्येने आपल्या मतदानाचे कर्तव्य बजावण्यासाठी येत आहेत, हे चित्र पाहून मला समाधान वाटले. मला स्वतःला चाळीस मिनिटे रांगेत उभं राहावं लागलं. हे चांगलं आहे. कारण सुरक्षित आणि विकसित भारतासाठी लोक मतदानाला बाहेर पडले आहेत, असे मला वाटतं, असेही तावडे यांनी नमूद केले.