राजकारण तापलं! सोमय्यांच्या रडारवर ठाकरे कुटुंबातील आणखी एक सदस्य

मुंबई : आयएनएस विक्रांत कथित आर्थिक गैरव्यवहार प्रकरणात मुंबई उच्च न्यायालयाने भाजप (BJP) नेते माजी खासदार किरीट सोमय्या (Kirit Somaiya) यांना अटकपूर्व जामीन मिळाला आहे. यामुळे चार दिवसांपासून नॉट रिचेबल असलेले किरीट सोमय्या जामीन मिळताच मुंबईत अवतरले आहेत. यानंतर त्यांनी पुन्हा एकदा ठाकरे कुटुंबीयांच्या विरोधात आघाडी उघडली आहे. त्यांच्या रडारवर आता ठाकरे कुटुंबातील आणखी एक सदस्य आला आहे.

सोमय्या म्हणाले की, उद्या उद्धव ठाकरे (Uddhav Thackeray) यांच्या कुटुंबातील आणखी एका व्यक्तीचा गैरव्यवहार उघड करणार आहे. मुख्यमंत्र्यांच्या मेव्हणाची मालमत्ता जप्त होऊनही ते गप्प का आहेत? डझनभर लोकांची प्रॉपर्टी जप्त झाली आहे. अनिल देशमुख, श्रीधर पाटणकर, नवाब मलिकांसह संजय राऊत, यशवंत जाधव, अजित पवार, हसन मुश्रीफ, सदानंद कदम, आनंदराव अडसूळ यांची संपत्ती जप्त झाली आहे.

सोमय्या म्हणाले की, विक्रांत वाचवण्यासाठी शिवसेनेनं समर्थन दिलं होतं. मात्र, संजय राऊतांनी ऊद्धव ठाकरेंच्या सांगण्यावरून माझ्यावर आरोप केले. रात्री एक वाजता माझ्यावर गुन्हा दाखल करण्यात आला आणि यालाच सेटींग म्हणतात. मुंबई महाराष्ट्राची राजधानी असून, ती कधीच वेगळी होणार नाही. मुंबई केंद्रशासित होणार नाही. मुंबईचा आम्हाला अभिमान आहे. शिवसेनेची ही स्टंटबाजी असून, उद्या ऊद्धव ठाकरेंच्या कुटूंबातील आणखी एक गैरव्यवहार बाहेर काढणार आहे.

शिवसेनेचे (shivsena) खासदार संजय राऊत (Sanjay Raut) यांनी आयएनएस विक्रांत बचावासाठी जमा केलेल्या पैशात सोमय्या यांनी भ्रष्टाचार केल्याचा आरोप केला होता. त्यानंतर सोमय्या यांच्याविरोधात पोलिसांत गुन्हा दाखल झाला होता. त्या विरोधात सोमय्या यांनी अटकपूर्व जामीनसाठी सत्र न्यायालयात अर्ज दाखल केला होता. मात्र, सत्र न्यायालयाने सोमय्यांना जामीन अर्ज फेटाळून लावला होता. तेव्हापासून सोमय्या नॉट रिचेबल होते. सत्र न्यायालयाने अटकपूर्व जामिन अर्ज फेटाळल्यानंतर त्यांनी जामीनासाठी उच्च न्यायालयात धाव घेतली होती. काल (ता.13) त्यांच्या अटकपूर्व जामीन अर्जावर सुनावणी झाली. अखेर उच्च न्यायालयाने त्यांना जामीन मंजूर केला.