विधानपरिषद निवडणूक : खोत-मेटेंचा पत्ता कट; भाजपने मित्रपक्षांच्या तोंडाला पुसली पानं

मुंबई : भाजपने आज विधान परिषदेच्या निवडणुकीसाठी पाच उमेदवारांची घोषणा केली आहे. यात प्रविण दरेकर आणि प्रसाद लाड या विद्यमान आमदारांना पुन्हा संधी देण्यात आली आहे. तर माजी मंत्री राम शिंदे यांचे विधानसभेतील पराभवानंतर विधानपरिषदेवर पुनर्वसन करण्यात आले आहे. याशिवाय श्रीकांत भारतीय आणि उमा खापरे या नव्या चेहऱ्यांनाही विधान परिषदेची लॉटरी लागली आहे. भाजपच्या केंद्रीय निवडणुक कार्यालयाकडून बुधवारी महाराष्ट्रातील पाच उमेदवारांच्या नावाची घोषणा करण्यात आली.

या यादीतून माजी मंत्री पंकजा मुंडे, चित्रा वाघ, माधव भंडारी, केशव उपाध्ये अशा पक्षातील चर्चेतील नावांचा आणि सदाभाऊ खोत, विनायक मेटे या मित्रपक्षांच्या नेत्यांचाही पत्ता कट करण्यात आला आहे. मागील काही दिवसांपासून सदाभाऊ खोत आणि मेटे यांना विश्रांती देण्यात येणार असल्याचे बोललेही जात होते. अखेर आज उमेदवारी जाहीर झाल्यानंतर या चर्चा खऱ्या ठरल्या आहेत. आता केवळ रासपचे महादेव जानकर हे एकमेव मित्रपक्षाचे आमदार विधानपरिषदेमध्ये असणार आहेत. . (BJP Announced candidates name for Legislative Council Election)

दरम्यान, सुभाष देसाई, दिवाकर रावते, (शिवसेना) प्रवीण दरेकर, सदाभाऊ खोत, प्रसाद लाड, विनायक मेटे, सुजितसिंह ठाकूर, स्व. आर. एस. सिंह, (सर्व भाजप) सभापती रामराजे निंबाळकर संजय दौंड (राष्ट्रवादी) हे दहा सदस्य निवृत्त होणार आहे. विधानसभेतील संख्याबळानुसार भाजपचे दोन सदस्य कमी निवडून येतील. या दोन जागांचा फायदा काँग्रेसला होणार आहे. काँग्रेसने आपले दोन उमेदवार या निवडणुकीत उतरवले आहेत.

विधान परिषदेसाठी २० जूनला निवडणूक होणार आहे. विधान परिषदेवर निवडून यायचे असेल तर २७ मतांची आवश्यकता असणार आहे. भाजप आणि मित्रपक्ष मिळून संख्याबळ ११३ होत आहेत. त्यामुळे भाजपच्या चार जागा निवडून येऊ शकतात. राष्ट्रवादी काँग्रेसचे (NCP) ५३, शिवसेना (Shivsena) ५६ आणि कॉंग्रेसचे (Congress) ४४ आमदार आहेत. तर अपक्ष आणि इतर मित्रपक्षांच्या सहाय्याने त्यांच्या सहा जागा निवडून येवू शकतात.