राणे लढाई जिंकले! अखेर मुंबई महापालिकेने घेतली माघार

मुंबई : केंद्रीय मंत्री नारायण राणे (Narayan Rane) यांना मोठा दिलासा मिळाला आहे. राणेंच्या जुहू येथील आदिश बंगल्यातील (Adish Bunglow) बेकायदा बांधकाम प्रकरणी मुंबई महापालिकेने (BMC) कारवाईची नोटीस बजावली होती. मात्र, महापालिकेने उच्च न्यायालयात (High Court) माघार घेतली आहे. बंगल्यावरील कारवाईचे आदेश मागे घेत असल्याचे महापालिकेने उच्च न्यायालयात सांगितले. यामुळे राणेंच्या बंगल्यावरील कारवाई टळली आहे.

राणेंच्या जुहू येथील आदिश बंगल्यातील बेकायदा बांधकामप्रकरणी मुंबई महापालिकेने त्यांना दोनदा नोटीस बजावली होती. पालिकेने पाठवलेल्या नोटिशीनंतर राणेंनी वकिलांमार्फत बंगल्यातील अंतर्गत बांधकाम नियमानुसार असल्याचा दावा केला होता. हा दावा फेटाळून महापालिकेने पुन्हा नोटीस पाठवत बांधकाम हटवण्याच्या सूचना केल्या होत्या. मात्र, आज महापालिकेने कारवाईचे हे आदेश मागे घेत असल्याची माहिती मुंबई उच्च न्यायालयात दिली. (Narayan Rane News)

आदिश बंगल्यावरील कारवाईसंदर्भात आज उच्च न्यायालयात सुनावणी झाली. राणे यांनी त्यांच्या कंपनीच्या वतीने आदिश बंगल्याबाबत याचिका दाखल केली होती. मुंबई महापालिका त्यांच्या बंगल्यावर तोडक कारवाई करणार होती. त्या आदेशाविरोधात दाखल याचिकेवर आज सुनावणी झाली. या सुनावणीवेळी आदिश बंगल्यावरीस कारवाईचा आदेश मागे घेण्यात येईल, असे महापालिकेने उच्च न्यायालयाला सांगितले. मुंबई महापालिकेचे महाधिवक्ता आशुतोष कुंभकोनी यांचे उच्च न्यायालयात ही माहिती दिली आहे. यामुळे नारायण राणे यांना कारवाईपासून दिलासा मिळाला आहे.

राणे यांच्या जुहू येथील आदिश बंगल्यात अनाधिकृत बांधकाम केल्याची तक्रार माहिती अधिकार कार्यकर्ते संतोष दौंडकर यांनी केली होती. त्यानंतर मुंबई महापालिकेने राणे यांना तीन वेळा नोटीस देत अनधिकृत बांधकाम काढून टाकण्यात यावे; अन्यथा कारवाई करण्यात येईल असे सांगितले हेाते. त्यानंतर हे प्रकरण मुंबई उच्च न्यायालयात गेले होते. आता या प्रकरणी महापालिकेने माघार घेतली आहे.