BMC News: अबब..! उंदीर मारण्यासाठी मुंबई महापालिकेचा तब्बल सव्वाचार कोटींचा खर्च; एक उंदीर मारण्यासाठी मोजले २३ रुपये

Mumbai : मुंबई महापालिकेने उंदीर मारण्यासाठी तब्बल सव्वा चार कोटी रूपये खर्च केल्याचे समोर आले आहे. विधिमंडळात देखील हा मुद्दा चांगलाच गाजला. विधानपरिषदेत राज्य सरकारने लेखी उत्तरात याबाबतची माहिती दिली आहे. उंदीर मारण्यासाठी लागणारा खर्च हा तब्बल सव्वा चार कोटींच्या घरात असल्याने याची मोठी चर्चा रंगली आहे.

जानेवारी ते एप्रिल या चार महिन्यात मुंबई महापालिकेने कंत्राटदारांमार्फत १ लाख ८५ हजार २७० उंदीर मारल्याची माहिती समोर आली आहे. तर यासाठी प्रत्येकी २३ रुपये प्रमाणे ४ कोटी २६ लाख १ हजार २१० रुपये खर्च करण्यात आलेत.

पावसाळ्यात साथीच्या रोगांचा धोका वाढू नये, यासाठी मुंबई महापालिकेकडून विविध उपाययोजना आखल्या जातात. महापालिका लेप्टो हा संसर्गजन्य आजार रोखण्यासाठी गेल्या अनेक वर्षापासून प्रयत्न करते. या आजाराला पसरवण्यास कारणीभूत असलेल्या उंदरांना मारण्यासाठी महापालिकेकडून मोहिम राबवली जाते.

दरम्यान, याच पार्श्वभूमीवर जानेवारी ते एप्रिल या चार महिन्यात तब्बल मुंबईतील १ लाख ८५ हजार २७० उंदरांचा खात्मा करण्यात आला आहे. पण यासाठी तब्बल सव्वा चार कोटी रूपयांचा खर्च झाल्याची माहिती सरकारने दिली. पण उंदीर मारण्यासाठी झालेल्या वाढीव खर्चाचा मुद्दा याआधी देखील अनेकदा गाजला आहे.

Edited By- Ganesh Thombare