Gopal Shetty : मुंबईत भाजपला मोठा धक्का; माजी खासदारांचे बंड

Mumbai : मुंबईत भाजपला मोठा धक्का बसला आहे. माजी खासदार गोपाळ शेट्टी यांनी बंडाचे निशाण फडकावले असून बोरीवली विधानसभा मतदारसंघातून ते अपक्ष उमेदवारी अर्ज दाखल करणार आहेत. या मतदारसंगातून भाजपने संजय उपाध्याय यांना उमेदवारी जाहीर केली आहे.

संजय उपाध्याय हे मतदारसंघाबाहेरील उमेदवार असल्याचे सांगत शेट्टींनी त्यांच्या उमेदवारीला थेट विरोध केला आहे. शेट्टींनी अपक्ष अर्ज दाखल केल्यास उपाध्याय यांच्या अडचणीत भर पडणार आहे. याबाबत बोलताना शेट्टींनी आता माघार घेणार नसल्याचे स्पष्ट केले आहे.

बंडखोरी शब्द माझ्याबाबत लागू होत नाही. मी तिकीट मागितले नव्हते. माझे नाव चर्चेत होते, हे खरे आहे. पण माझी बंडखोरी नाही. मी दुसऱ्या पक्षात जात नाही. सातत्याने चौथ्यांदा बोरीवलीमध्ये बाहेरील उमेदवारांचा प्रयोग करण्याचा प्रयत्न सुरू आहे. त्याविरोधात मी हा निर्णय घेतला आहे. मी आज निर्णय घेतला नाही तर मग पुढे हा निर्णय कोण घेणार, हे लोकांचे म्हणणे आहे. हे माझ्या मनाला चांगलेच लागून गेले, असे शेट्टींनी म्हटले आहे.

बाहेरील उमेदवारांनी इतर ठिकाणी जाऊन लढू नये, असे नाही. पियुष गोयल यांचेही आम्ही स्वागत केले. कारण ते सक्षम उमेदवार आहे. लोकहितासाठी त्यांचे स्वागत केले. पण स्थानिक लोकांशी चर्चा न करता प्रत्येकवेळी तुम्ही हे करणार असाल, ते योग्य नाही. म्हणून येणाऱ्या काळात पुन्हा अशा घटना घडू नये, यासाठी हा निर्णय घेतल्याचे शेट्टी यांनी स्पष्ट केले.

पक्षाने माझ्यावर अन्याय केलेला नाही. मला आता पक्षाच्या तिकीटावर लढण्याची ऑफर आली तरी मी लढणार नाही. एका सामान्य कार्यकर्त्याला तिकीट मिळाले तर मला आनंदच आहे. भविष्यात अशा चुका होऊ नये, याची खबरदारी पक्षाने घेतली तरी माझा विजय झाला, असे मी समजेन, असे शेट्टी म्हणाले.

आता माघार घेण्याचा दिवस निघून गेला आहे. बोरीवलीची जागा जाऊ नये, हेही गरजेचे आहे, असे सांगत गोपाळ शेट्टी यांनी आपण आता माघार घेणार नसल्याचे स्पष्ट केले आहे. त्यामुळे महायुतीचे अधिकृत उमेदवार संजय उपाध्याय यांच्या अडचणी वाढणार आहे.