Eknath Shinde: एकनाथ शिंदेंचं महाविकास आघाडीला आव्हान! अडीच वर्षांच्या कारभाराचा हिशेब द्या ?

Mumbai News: राज्यात येत्या 20 नोव्हेंबरला विधानसभा निवडणुका पार पडणार आहेत. या निवडणुकींसाठी गेल्या अनेक दिवसांपासून महायुती आणि महाविकास आघाडी यांची खलबतं सुरू होती. त्यामुळे या दोघांमध्ये चुरशीची लढत या निवडणुकीत पाहायला मिळणार आहे. काल 4 नोव्हेंबरला उमेदवारी अर्ज मागे घेण्याचा शेवटचा दिवस होता. त्यानंतर अनेक उमेदवारांनी अर्ज मागे घेतले असले तरी, अनेक ठिकाणी अजूनही बंडखोर आपल्या भूमिकांवर ठाम आहेत.

कोणत्या जागांवर कोणते उमेदवार निवडणूक लढणार हे निश्चित झाले आहे. त्यामुळे राज्यात प्रचाराचा धुराळा सुरु झाला आहे. अशातच आता मुख्यमंत्री एकनाथ शिंदे यांच्या हस्ते शिंदे गटाचे उमेदवार विश्वनाथ भोईर यांच्या निवडणूक प्रचार कार्यालयाचे उद्घाटन करण्यात आले. यावेळी मुख्यमंत्री एकनाथ शिंदे यांनी महाविकास आघाडीला चॅलेंज दिले आहे.

मुख्यमंत्री एकनाथ शिंदे (Eknath Shinde) यांनी विश्वनाथ भोईर यांच्या निवडणूक प्रचार कार्यालयाचे उद्घाटन केले. यावेळी एकनाथ शिंदेंनी जोरदार भाषण करत ‘लाडकी बहीण’ योजनांचा उल्लेख करत विरोधकांवर डिवचले. "लाडक्या बहिणी इथे आहेत, आता त्यांना भाऊबीज दरवर्षी नाही तर दर महिन्याला मिळणार आहे.

विरोधक सतत लाडकी बहीण योजना बंद करण्याच्या पाठी लागले आहेत. विरोधी पक्षांनी लाडकी बहीण योजना बंद करण्याचा प्रयत्नही केला आहे. माझ्या लाडक्या बहि‍णींसाठी हा तुमचा लाडका भाऊ जेलमध्ये जायला तयार आहे,"असे एकनाथ शिंदे म्हणाले.

"आधीचे सरकार हप्ते घेणारे होतं. त्यांचे मंत्री जेलमध्ये गेले. अडीच वर्षात महाविकास आघाडीने (MVA) काय केलं आणि आम्ही दोन वर्षात काय केलं याचा हिशोब आम्ही देऊ. होऊन जाऊ द्या दुध का दुध पाणी. आम्ही हिशोब द्यायला तयार आहोत, तुम्ही देणार का?" असे ओपन चॅलेंज एकनाथ शिंदेंनी दिले.

योजनेला विरोध का ?

"जर तुमच्याकडे कोणी मत मागायला आलं तर त्यांना जाब विचारा की लाडकी बहीण योजनेला विरोध का केला? ही योजना बंद करण्यासाठी कोर्टात का गेलात? हे सर्वसामान्यांचे सरकार आहे, असेही एकनाथ शिंदेंनी म्हणाले.