Maharashtra Politics : CM फडणवीसांचा एकनाथ शिंदेंना आणखी एक धक्का! शिंदे सरकारने घेतलेला 'तो' निर्णय केला रद्द

Mumbai News, 14 Oct : मुख्यमंत्री देवेंद्र फडणवीस यांनी उपमुख्यमंत्री एकनाथ शिंदे यांनी त्यांच्या मुख्यमंत्रिपदाच्या काळात घेतलेला आणखी एक निर्णय रद्द केला आहे. त्यामुळे आता फडणवीसांनी शिंदेंना मोठा धक्का दिल्याचं बोललं जात आहे.

एकनाथ शिंदे सरकारच्या काळात बच्चू कडू यांच्या प्रहार जनशक्ती पक्षाच्या कार्यालयासाठी मंत्रालयाजवळ उपलब्ध करून दिली होती. मात्र, आता ती जागा देण्याचा निर्णय फडणवीस सरकारने रद्द केला आहे. तर हा निर्णय बिहार विधानसभा निवडणुकीच्या पार्श्वभूमीवर घेतल्याचं सांगितलं जात आहे.

नेमकं प्रकरण काय?

एकनाथ शिंदे मुख्यमंत्री असताना मंत्रालयाजवळ असलेल्या जीवन बिमा मार्ग येथे 909 चौरस फूट जागा जनता दल सेक्युलर पक्षासाठी राज्य सरकारने दिलेल्या जागेपैकी 200 चौरस फूट जागा जनता दल सेक्युलर पक्षासाठी ठेवून उर्वरीत जवळपास 700 चौरस फूटांटी जागा प्रहार जनशक्ती कार्यालयाला उपलब्ध करून देण्यात आली होती.

मात्र, आता बिहारमधील निवडणुकीच्या तोंडावर फडणवीस सरकारने प्रहार पक्षाला जागा देण्याचा निर्णय रद्द केला आहे. त्यामुळे आता फडणवीस सरकारने एकनाथ शिंदे सरकारचा आणखी एक निर्णय रद्द केला आहे. महत्वाचं म्हणजे उद्धव ठाकरेंविरोधात बंड करुन महायुतीसोबत जाणाऱ्या आणि एकनाथ शिंदेंना साथ देणाऱ्या बच्चू कडू यांनाच आता फडणवीसांनी दणका दिल्याचं बोललं जात आहे.

तर बच्चू कडू मागील काही दिवसांपासून शेतकरी कर्जमाफीच्या मुद्द्यावरून आक्रमक भूमिका घेत आहेत. त्यामुळेच राज्य सरकारने हा निर्णय घेतला का? अशा चर्चा सुरू आहेत. दरम्यान फडणवीस सरकारच्या या निर्णयावर बच्चू कडू यांनी देखील प्रतिक्रिया दिली आहे.

ते म्हणाले, 'भाजपचं नेचर, गरज सरो आणि वैद्य मरो असं आहे. त्यांच्या विरोधात काय केलं की ते असे कारनामे करतात. ते कार्यालय आम्हाला दिलं होतं मात्र आता भाऊंनी पुन्हा मी किती राजकारणी आहे हे दाखवून दिलं', असं म्हणत त्यांनी फडणवीसांच्या निर्णयावर नाराजी व्यक्त करत आम्ही कोर्टात जाणार असल्याचं सांगितलं.