Devendra Fadnavis On Advertise : 'त्या' जाहिरातीवरून मुख्यमंत्री शिंदेंनी चूक मान्य केली; फडणवीसांनी स्पष्टच सांगितलं

Eknath Shinde Accept Mistake Of Advertise : 'राष्ट्रात मोदी आणि राज्यात शिंदे' या अशायाची जाहिरात काही दिवसांपूर्वी राज्यातील सर्व वृत्तपत्रांत प्रसिद्ध झाली होती. त्यानंतर मुख्यमंत्री एकनाथ शिंदे आणि उपमुख्यमंत्री देवेंद्र फडणवीस या दोघांमध्ये मतभेद असल्याची चर्चा सुरू झाली. यावरून विरोधकांनीही राज्य सरकारवर टीका केली होती. या जाहिरातीबाबत खुद्द मुख्यमंत्री एकनाथ शिंदे यांनी चूक मान्य केल्याचे उपमुख्यमंत्री देवेंद्र फडणवीस यांनी आता स्पष्ट केले आहे. (Latest Political News)

देवेंद्र फडणवीस एका खासगी वृत्तवाहिनीशी बोलत होते. यावेळी त्यांनी राज्यातील अनेक प्रश्नांना सविस्तर उत्तरे देण्याचा प्रयत्न केला. फडणवीस यांना सरकारमधील मतभेदांबाबत छेडण्यात आले. या मतभेदांतूच शिंदे गटाकडून जाहिरात देऊन फडणवीस यांची कोंडी करण्याचा प्रयत्न झाल्याची चर्चा होती. यावर देवेंद्र फडणवीस म्हणाले की, "आमच्यात कुठलेही मतभेद नाहीत. त्यांनी दुसऱ्याच दिवशी सांगितले चुकीची जाहिरात प्रसिद्ध झाली. आमच्या लोकांनी चूक केली आहे."

फडणवीस यांनी शिंदे गटातील आमदारांवरही यावेळी निशाणा साधला. फडणवीस म्हणाले, "प्रत्येक पक्षात कमी बुद्धीचे लोक असतात. ते चुका करतात. तशीच चूक जाहिरातीची झाली. मात्र इतक्या छोट्या चुकीमुळे आमच्यात वाद वाढेल, आमचे सरकार कोसळेल असे अनेकांना वाटले. याकडे आमचे विरोधक लक्ष देऊनच होते. मात्र आम्ही खुर्च्या तोडायला आलेलो नाही. आम्ही मोठ्या विचारातून सरकार बनवले आहे. आमच्या सरकारचे ध्येय मोठे आहे."

यावेळी फडणवीस यांनी युतीच्या सरकारमधील शिंदे यांच्याशी असलेल्या 'बाँडिंग'बाबतही माहिती दिली. ते म्हणाले, "एकनाथ शिंदे आणि माझ्यात असलेला समन्वय अपवादात्मकच इतर कुठल्याही सरकारच्या काळात दिसला असले. मी मुख्यमंत्री असलेल्या शिंदे यांच्या कामात कधीही ढवळाढवळ करत नाही. तर शिंदे यांनी मी उपमुख्यमंत्री असल्याचे मला कधीही जाणवू दिले नाही. आम्ही दोघेही एकमेकांच्या सर्व मान मर्यांदांचे पालन करत असल्याचे राज्यात विकासाला गती मिळत आहे."

(Edited by Sunil Dhumal)