ठाकरे सरकारचे मंत्री ड्रग्स माफियांचे प्रवक्ते झाले का ?

पुणे : कर्तव्य बजावणाऱ्या आधिकाऱ्यांवर चुकीचे आरोप करून त्यांचे खच्चीकरण करण्याचा उद्योग ठाकरे सरकारमधील मंत्री नवाब मलिक करीत आहेत. मंत्री असलेले मलिक ड्रग्स माफियांचे प्रवक्ते आहेत का ? असा प्रश्‍न भारतीय जनता पार्टीचे नेते व माजी खासदार किरीट सोमय्या यांनी आज उपस्थित केला.

समीर वानखेडे हा एक नंबरचा बोगस माणूस आहे.'एनसीबी'च्या माध्यमातून भाजपवाल्यांसाठी हजारो कोटींच्या वसुलीचा धंदा त्यांनी चालवला आहे. या सगळ्याचे पुरावे देऊन वानखेडेंची नोकरी घालवल्याशिवाय आणि त्यांना तुरुंगात टाकल्याशिवाय मी थांबणार नाही,' असा इशारा राष्ट्रवादी काँग्रेसचे प्रवक्ते तथा अल्पसंख्याक मंत्री नवाब मलिक यांनी गुरूवारी एका कार्यक्रमात दिला होता.

मलिक यांच्या या वक्तव्याचे तीव्र पडसाद आज समाज माध्यमात उमटले. यावरून सोमय्या यांनी मलिक यांच्यावर थेट हल्ला केला. अंबरनाथ येथे पत्रकारांशी बोलताना ते म्हणाले, ‘‘मलिक हे राज्याचे मंत्री आहेत की नाही असा प्रश्‍न पडावा अशा पद्धतीने ते बोलत आहेत. मंत्री असूनही ते ड्रग्स माफियांचे प्रवक्ते असल्यासारखे वारंवार बोलत आहेत.त्यांच्या या वक्तव्यावर ठाकरे सरकारमधील कुणीही बोलायला तयार नाही.मलिक यांच्या पक्षाचे अध्यक्ष शरद पवार हेदेखील यावर बोलत नाहीत याचा अर्थ पवार व ठाकरे यांचीच भाषा मलिक बोलत आहेत, असे समजावे का’’

मलिक हे शरद पवार यांच्यावतीने बोलतात की मुख्यमंत्री उद्धव ठाकरे यांच्यावतीने बोलत याचे स्पष्टीकरण ठाकरे व पवार यांनी करावे, असे आवाहन केले. व्यसन करताना काही तरूण पकडले गेले. ते गुन्हेगारी पाश्‍र्वभूमीचे आहेत असे मला म्हणायचे नाही. मात्र, आमदार-खासदारांनी केलेल्या कायद्याच्या आधारेच कोर्ट काम करीत आहे हे सर्वांनी ध्यानात घ्यायला हवे, असे सोमय्या यांनी सांगितले.

Edited By : Umesh Ghongade