Eknath Shinde Politics : एकनाथ शिंदेंना कशाची भीती? मुंबईतील विजयी नगरसेवकांचा मुक्काम हाॅटेलमध्ये! ठाकरे गेम फिरवणार?

Eknath Shinde News : मुंबई महापालिका निवडणुकीत भाजप आणि एकनाथ शिंदेंच्या शिवसेनेला बहुमत मिळाले आहे. शिंदेंच्या मदतीशिवाय भाजप सत्ता स्थापन करू शकत नाही. तर, ठाकरे देखील सत्तेपासून खूप दूर आहेत. तरी देखील शिंदेंच्या शिवसेनेच्या 29 विजयी झालेल्या नगरसेवकांचा मुक्काम पुढील तीन दिवस हाॅटेलमध्ये असणार आहे. वांद्रे येथील ताज हाॅटेलमध्ये या नगरसेवकांचा मुक्काम असणार आहे. आज संध्याकाळी सर्व नगरसेवकांना तेथे येण्याच्या सूचना करण्यात आल्या आहेत.

जो पर्यंत महापौर निवड होत नाही तो पर्यंत या नगरसेवकांना हाॅटेलमध्येच थांबण्याच्या सूचना देण्यात आल्या आहेत. शिंदेंकडून विजयी झालेले काही नगरसेवकांनी उद्धव ठाकरेंसोबत देखील काम केले आहे. त्यामुळे ऐनवेळी ठाकरे दगाफटका करून नगरसेवक फोडून सत्ता स्थापनेचा दावा करू शकतात, याची भीती देखील शिंदेंना असल्याची चर्चा आहे. त्यामुळेच ही काळजी घेत असल्याचे सांगितले जात आहे.

एका मत प्रवाहानुसार ठाकरेच नाही तर भाजपपासून देखील आपल्या नगरसेवकांना लांब ठेवण्यासाठी हा प्लॅन शिंदेंनी आखल्याचे सांगितले जात आहे. महापौर भाजपचा होत असला तरी शिंदेंच्या नगरसेवकांशिवाय ते शक्य नाही. त्यामुळे भाजपसोबत बोलणी करून मुंबई महापालिकेत सत्तेत मोठा वाटा मिळवण्यासाठी ही खेळी असल्याचे बोलले जात आहे. कारण शिंदेंनी जास्त ताणले तर भाजप देखील त्यांचे नगरसेवक फोडू शकते, अशी चर्चा आहे.

महापौरपदावर दावा सांगणार?

मुंबईचा महापौर हा शिवसेनेचा व्हावा, अशी इच्छा एकनाथ शिंदेंच्या शिवसेनेत व्यक्त केली जात आहे. कमी जागा असताना भाजपने एकनाथ शिंदेंना मुख्यमंत्रिपद दिले होते. मग मुंबईच महापौर पद द्यायला त्यांना काय हरकत आहे? अस एक मत प्रवाह शिंदेंच्या शिवसेनेत आहे. त्यामुळे शिंदे महापौर पदावर देखील दावा सांगू शकतात अशी चर्चा आहे.