निवडणूक गुजरातमध्ये, मात्र सुट्टी मिळणार महाराष्ट्रातील 'या'चार जिल्ह्यात...

पिंपरी : गुजरात विधानसभेच्या सार्वत्रिक निवडणुकीसाठी पुढील महिन्यात १ व ५ तारखेला दोन टप्यांत मतदान होत आहे. विधानसभा वा लोकसभा निवडणूक होणाऱ्या राज्यांत मतदानाच्या दिवशी मतदान करण्याकरिता सुट्टी जाहीर केली जाते. मात्र, गुजरात विधानसभा निवडणुकीसाठी महाराष्ट्रातील चार जिल्ह्यात ती देण्यात येणार आहे,असे सांगितले,तर आश्चर्य वाटेल ना? पण,ते खर आहे. (Gujrat Election, Latest News)

गुजरात विधानसभा निवडणुकीत मतदार असलेल्या पालघर, नाशिक, नंदूरबार आणि धुळे या जिल्ह्यातील मतदारांना ही भरपगारी सुट्टी मिळणार आहे. सुट्टी शक्य नसेल,अशा खासगी कंपन्यातील अधिकारी आणि कर्मचारी मतदारांना आपला मतदानाचा हक्क बजावण्याकरिता दोन तासांची सवलत देण्यास सांगण्यात आले आहे.तसा आदेश राज्याच्या उद्योग,कामगार व ऊर्जा विभागाने नुकताच काढला आहे.

त्यानुसार गुजरात (Gujrat) राज्यात मतदार असलेल्या म्हणजे तेथे राहणाऱ्या पण,वरील चार जिल्ह्यांत काम करणाऱ्या चाकरमान्यांना ही सुट्टी वा सवलत मतदानासाठी दिली जाणार आहे.तसे तेथील जिल्हाधिकारी, राज्य निवडणूक आयोग,राज्याचे मुख्य निवडणूक अधिकारी यांच्यासह गुजरात राज्याच्या मुख्य निवडणूक अधिकाऱ्यांनाही कळविण्यात आले आहे. या आदेशाचा भंग करणाऱ्यांविरुद्ध कारवाई करण्यात येईल,असा इशारा सबंधितांना देण्यात आला आहे.

दरम्यान, काही आस्थापना त्यातही खासगी कंपन्या या आपल्या अधिकारी, कर्मचारी मतदारांना भरपगारी सुट्टी वा सवलत मतदान करण्यासाठी देत नसल्याचे आढळून आले आहे.त्यामुळे अनेकांना मतदानापासून वंचित रहावे लागते.परिणामी मतदानाचा टक्का घसरतो.लोकशाहीसाठी ही बाब घातक असल्याने राज्याच्या उद्योग विभागाचे उपसचिव डॉ. श्रीकांत पुलकुंडवार यांनी यासंदर्भातील आपल्या आदेशात म्हटले आहे.