Aslam Shaikh Studio Scam : राऊतांनंतर अस्लम शेख ED च्या रडारवर ; सोमय्यांचे सूचक टि्वट

मुंबई : मढमधील कथित स्टुडिओ घोटाळा प्रकरणी पर्यावरण मंत्रालयाने काँग्रेस नेते अस्लम शेख (aslam sheikh) यांना नोटीस पाठवली आहे.पर्यावरण विभागाने मुंबई जिल्हाधिकारी आणि महानगरपालिकेला कठोर कारवाई करण्याचे आदेश दिले आहेत. याबाबत भाजपचे माजी खासदार किरीट सोमय्या (Kirit Somaiya) यांनी टि्वट करुन माहिती दिली आहे.

पर्यावरण मंत्रालयाकडून नुकतेच मुंबई जिल्हाधिकारी आणि महानगरपालिकेला नोटीस जारी करून मढ आईसलँडमधील चित्रपट स्टूडिओंच्या अनधिकृत बांधकामावर कडक कारवाई करण्याचे आदेश दिले आहेत.

याप्रकरणी आता महाविकास आघाडी सरकारमधील माजी वस्त्रोद्योग, मस्यव्यवसाय आणि बंदरे विकास मंत्री काँग्रेसचे आमदार अस्लम शेख हे ईडीच्या रडारवर आहे. भाजप नेते किरीट सोमय्या यांनी 1000 कोटींचा भ्रष्टाचार झाल्याचे म्हटले असून हे स्टूडिओ पाडण्यात यावे अशी अपेक्षा व्यक्त केली आहे.

"अस्लम शेख – मढ मार्वे ₹1000 कोटींचा स्टुडिओ घोटाळा. महाराष्ट्राच्या पर्यावरण मंत्रालयाने नोटीस जारी केली आहे. मुंबई जिल्हाधिकारी आणि महानगरपालिकेला कठोर कारवाई करण्यास सांगितलं. मला स्टुडिओ तोडण्याची कारवाईची अपेक्षा आहे," असे किरीट सोमय्या यांनी म्हटले आहे.

टि्वटमध्ये किरीट सोमय्यांनी अस्लम शेख यांच्यावर केलेले आरोप

• अस्लम शेख यांनी समुद्रात स्टुडिओ उभारला आहे. असे पाच स्टुडिओ आहेत. ज्यात CRZ नियमांच उल्लघन केले आहे.

• गोपाळ शेट्टी यांच्यासोबत मी पाहणी केली. कागदावर ही जागा समुद्रापासून दूर दाखवली आहे.

• आदित्य ठाकरे यांनी पण येथे भेट दिली होती. ज्या जागेवर 2019 साली काही नव्हते तिथे 2021 ला स्टुडिओ उभारला आहे.

• अस्लम शेख आणि भाटिया स्टुडिओ यांचे मालक भागीदार असल्याचे सांगितले जाते आहे.

• या जागेवर पर्यावरण विभागाने सहा महिन्यासाठी फिल्म सेट उभारणी साठी परवनगी दिली होती.

• अस्लम शेख यांच्या आशीर्वादाने एक हजार कोटी रुपयांचा स्टुडिओ उभारला आहे.