Dhananjay Munde : ...अखेर मुख्यमंत्री देवेंद्र फडणवीसांनी धनंजय मुंडेंबाबत विधानसभेत केली महत्वपूर्ण घोषणा!

Mumbai, 11 March : मस्साजोगचे सरपंच संतोष देशमुख यांच्या खून प्रकरणी अन्न व नागरी पुरवठा मंत्री धनंजय मुंडे यांनी अखेर मागील आठवड्यात ४ मार्च रोजी आपल्या मंत्रिपदाचा राजीनामा दिला. त्याबाबतची घोषणा मुख्यमंत्री देवेंद्र फडणवीस यांनी माध्यमांसमोर केली होती. त्यावरून विधानसभेत मोठा गदारोळ उडाला होता. मुख्यमंत्री फडणवीस यांनी धनंजय मुंडे यांच्या राजीनाम्याची घोषणा विधानसभेत करायला पाहिजे होते. विधानसभा सदस्यांना त्याबाबत माहिती देणे गरजेचे होते, असा आरोप केला होता. काँग्रेस आमदार नाना पटोले यांनी आज पुन्हा हा मुद्दा मांडताच फडणवीसांनी मुंडेंबाबतची महत्वपूर्ण माहिती सभागृहाला दिली.

संतोष देशमुख यांच्या खून प्रकरणी अटकेत असलेला वाल्मीक कराड हा मंत्री धनंजय मुंडे (Dhananjay Munde) यांच्या जवळचा आहे, असे खुद्द मुंडेंनीच जाहीरपणे सांगितले होते. त्यामुळे मुंडे यांचा राजीनामा सर्वच स्तरातून मागण्यात येत होता. मात्र, चौकशीत त्यांचा संबंध अजून आढळलेला नाही, असे सांगून सत्ताधारी पक्षांकडून मुंडेंचा बचाव करण्यात येत होता.

मागील आठवड्यात देशमुख खूप्रकरणी दोषारोपपत्र दाखल करण्यात आले होते. त्यानंतर देशमुख यांना मारहाण झाल्याचे फोटो व्हायरल झाले होते. त्यानंतर जनभावना संतप्त झाली होती. ते लक्षात घेऊन धनंजय मुंडे यांनी मंत्रिपदाची राजीनामा दिला होता. मात्र, मुंडेंनी राजीनामापत्रात आपल्या आरोग्याचा उल्लेख केला होता. मुंडे यांचा राजीनामा आल्यानंतर मुख्यमंत्री देवेंद्र फडणवीस (Devendra Fadnavis) यांनी माध्यमासमोर त्याबाबतची घोषणा केली होती.

मुंडेंच्या राजीनाम्याची घोषणा मुख्यमंत्र्यांनी विधानसभेत करायला हवी होती, असे म्हणत विरोधकांनी सभागृहात गोंधळ घातला होता. धनंजय मुंडे अजूनही मंत्री आहेत का, त्यांचा राजीनामा घेण्यात आला आहे का, असे सवाल जितेंद्र आव्हाड, जयंत पाटील, रोहित पवार यांच्यासह काँग्रेसचे आमदारही करत होते. त्यावरून विधानसभेत गदरोळ माजला होता.

दरम्यान, काँग्रेस आमदार नाना पटोले यांनी आज पुन्हा विधानसभेत हा प्रश्न उपस्थित केला. धनंजय मुंडे यांचा जो राजीनामा झाला आहे का, ते आज मंत्री आहे की नाही, हे सभागृहाला सांगावं, एवढी आमची अपेक्षा आहे.

पटोले यांच्या प्रश्नावर विधानसभा अध्यक्ष राहुल नार्वेकर यांनी धनंजय मुंडे यांच्या राजीनाम्यासंदर्भातील रुलिंग मी देईन, असे सांगितले. त्याबाबत नार्वेकर बोलत असतानाच मुख्यमंत्री देवेंद्र फडणवीस उठले आणि म्हणाले, अध्यक्ष महोदय, आपल्या रुलिंगच्या पूर्वी मी नाना पटोले यांच्या मनात काही शंका असेल तर सांगतो की, ते आता मंत्रिमंडळाचे सदस्य नाहीत, असे उत्तर दिलं.

मुख्यमंत्री हे सांगताना धनंजय मुंडे यांचे नाव घेतले नाही, त्यामुळे नाना पटोले यांचे समाधन न झाल्याने ते म्हणजे कोण, असा प्रश्न केला. त्यावर विधानसभा अध्यक्ष नार्वेकर तुम्ही जे विचारलं ते, असे उत्तर दिलं. मुख्यमंत्री फडणवीस यांनी तुम्ही जे विचारलं, त्यांच्याबद्दल सांगतो. धनंजय मुंडे आता मंत्रिमंडळाचे सदस्य नाहीत, असे स्पष्ट केले.