Hemant Patil Resignation : हेमंत पाटील लोकसभा अध्यक्षांकडे राजीनामा सादर करणार ?

Mumbai News : राज्यात मराठा आरक्षणाचा मुद्दा पेटला असताना दुसरीकडे शिंदे गटाचे खासदार हेमंत पाटील यांनी आरक्षणासाठी मराठा समाजातील आंदोलकांसमोरच राजीनामा दिला. त्यांच्या राजीनाम्याचे पत्रही व्हायरल झाले.त्यानंतर खासदार पाटील आज (ता.३०) लोकसभा अध्यक्षांची भेट घेणार आहे.

आज दुपारी त्यांनी अध्यक्षांकडे भेटीची वेळ मागितली आहे. लोकसभा अध्यक्षांकडे ते राजीनामा सादर करण्याची शक्यता आहे. राज्यात आरक्षणाचा प्रश्न किती गंभीर आहे हेही सांगणार असल्याची माहिती आहे. दरम्यान, हेमंत पाटील यांच्या राजीनाम्याची बातमी कळताच मुख्यमंत्री एकनाथ शिंदे यांनी तात्काळ दखल घेत हेमंत पाटलांना तातडीने भेटीसाठी बोलावले आहे. या भेटीनंतर हेमंत पाटील राजीनाम्यावर ठाम राहतात, की निर्णय मागे घेतात,याकडे संपूर्ण राज्याचे लक्ष लागले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मराठा आरक्षणाचा तिढा सुटत नसल्याने राज्यभरातील मराठा समाज आक्रमक झाला आहे. अशातच, केंद्र सरकारकडे मराठा समाजाच्या आरक्षणाची मागणी करावी, यासाठी काही आंदोलकांनी खासदार पाटील यांची भेट घेतली होती. सरकार आरक्षण देत नसल्याने त्यांनी खासदारकीचा राजीनामा द्यावा, अशी मागणीही आंदोलकांनी केली. त्यांच्या या मागणीला प्रतिसाद देत पाटील यांनी आंदोलकांसमोरच तत्काळ स्वत:च्या लेटरहेडवर राजीनामा लिहीला.

मराठा आरक्षणासाठी मनोज जरांगे पाटील यांच्या आमरण उपोषणाचा आजचा सहावा दिवस आहे.त्यांच्या समर्थनार्थ राज्यभरात ठिकठिकाणी साखळी उपोषणे सुरु आहेत. त्यातच गेल्या आठ-दहा दिवसांत अनेक मराठा समाजातील तरुणांनी आत्महत्या केल्या. राज्यातील अनेक गावांमध्ये राजकीय नेतेमंडळींना गावबंदी करण्यात आली.सत्ताधारी नेत्यांसह विरोधी पक्षातील नेत्यांनाही मराठा आंदोलकांच्या रोषाचा सामना करावा लागत आहे. इतकेच नव्हे तर, आरक्षणासाठी राज्यातील शेकडो पदाधिकाऱ्यांनीही पदाचे राजीनामेही दिले.

Edited By- Anuradha Dhawade