अजून किती बलात्कारी व महिलांवर अत्याचार करणाऱ्यांना वाचवणार- चित्रा वाघ संतापल्या

मुंबई : शिवसेना आमदाराने कुटुंबियांसोबत मिळून भावजयीला बेदम मारहाण केल्याची धक्कादायक घटना वैजापूर तालुक्यातून उघडकीस आली आहे. या प्रकरणी शिवसेना (Shivsena) आमदार रमेश बोरनारे (Ramesh Bornare) यांच्यासह त्यांच्या कुटुंबातील अन्य नऊ जणांवर देखील गुन्हा दाखल करण्यात आला आहे. पोलीस या घटनेचा तपास करत आहेत. एका आमदारानेच आपल्या भावजयीला अशा प्रकारे बेदन मारहाण केल्याने राजकीय वर्तुळात खळबळ उडाली आहे.

या घटनेवर भाजपच्या प्रदेश उपाध्यक्ष चित्रा वाघ यांनी राज्यातील ठाकरे सरकारवर संताप व्यक्त केला आहे. 'आज म्हणे महिलाधोरणाचा मसुदा शिवरायांच्या चरणी अर्पण केलायं. त्याच शिवरायांच्या महाराष्ट्रात वैजापूरचा शिवसेना आमदार रमेश बोरणारेने भाजपच्या कार्यक्रमाला का गेली म्हणत महिलेला बेदम मारहाण केली.. गुन्हा दाखल पण कारवाई शुन्य उलट आज पिडीतेवरचं ॲट्रोसिटीचा गुन्हा दाखल केला आहे.

यावर महिलाधोरणकर्ते काही बोलणार का? अजून किती बलात्कारी व महिलांवर अत्याचार करणाऱ्यांना वाचवणार आहात? महाराज असते तर कडेलोट केला असता हो या सरकारचा.हे सरकार गोरगरीबांचं धार्जीणं नाही तर सरकारचे कलाकारी मंत्री आमदार खासदार व त्यांच्या बगलबच्चे धार्जीणं आहे,'' असं ट्विट करत चित्रा वाघ यांनी राज्य सरकारवर टीकेचा आसुड ओढला आहे.

दरम्यान, राज्याच्या महिला आयोगाने या प्रकरणाची दखल घेतली असून आयोगाच्या अध्यक्षा रुपाली चाकणकर यांनी या प्रकरणी वैजापूर पोलिसांना या घटनेचा अहवाल तीन दिवसांच्या आत सादर करण्याचे आदेश दिले आहेत. ''शिवसेना आमदार रमेश बोरनारे यांनी त्यांच्या भावजयीला व चुलत भावाला मारहाण केल्याची बातमी समाजमाध्यमाद्वारे समजली. याप्रकरणी त्यांच्यावर गुन्हा दाखल झाला आहे. एका जबाबदार लोकप्रतिनिधीकडून असे कृत्य होणे हे अतिशय निंदनीय आहे. या प्रकरणी औरंगाबाद पोलिसांनी यांच्यावर योग्य ती कार्यवाही करून याचा अहवाल तीन दिवसांच्या आत राज्य महिला आयोगास सादर करावा,'' असे आदेश रुपाली चाकणकरांनी दिले आहेत.

काय आहे प्रकरण-

एका वाहिनीने दिलेल्या वृत्तानुसार, सटाणा या ठिकाणी गुरुवारी भाजपच्या शाखेचं उद्घाटनाचा कार्यक्रम आयोजित करण्यात आला होता. केंद्रीय अर्थ राज्यमंत्री डॉ. भागवत कराड यांच्या हस्ते करण्यात आलं. या कार्यक्रमाला आमदार रमेश बोरनारे यांच्या चुलत भावाची पत्नी जयश्री दिलीप बोरनारे याही पतीसह उपस्थित होत्या. त्यावेळी जयश्री बोरनारे यांनी डॉ. कराड व माजी नगराध्यक्ष डॉ. दिनेश परदेशी यांचा सत्कार केला.

मात्र हा सत्कार बोरनारे कुटुंबीयांच्या सहन झाला नाही. त्याचा राग मनात धरून आमदार बोरनारे यांच्या कुटुंबीयांनी जयश्री यांना लाथाबुक्क्यांनी जबर मारहाण केली. या मारहाणीत त्या गंभीर जखमी झाल्या. इतकेच नव्हे तर बोरनारे कुटुंबियांनी जयश्री यांना शिवीगाळ करून जिवे मारण्याचीही धमकी दिली. आमदार बोरनारे स्वतः या मारहाण केल्याचे जयश्री यांनी आपल्या तक्रारीत म्हटले आहे.

जयश्री बोरनारे पतीसोबत गोदावरी कॉलनीत एका नातेवाईकांच्या श्राद्धाच्या कार्यक्रमात गेल्या होत्या. या भर कार्यक्रमातच बोरनारे कुटुंबियांनी जयश्री आणि त्यांच्या पतीलाही जबर मारहाण केली. त्यानंतर दोघांनीही पोलीस ठाणे गाठले बोरनारे कुटुंबियांविरोधात तक्रार दिली. पोलिसांनी त्यांना उपचारासाठी जवळच्या उपजिल्हा रुग्णालयात दाखल केले. या प्रकरणी आमदार रमेश बोरनारे, त्यांचा भाऊ संजय बोरनारे, दीपक बाबासाहेब बोरनारे, अजिंक्य बोरनारे, रणजीत चव्हाण, संपत बोरनारे, अबोली बोरनारे, वर्षा बोरनारे, संगिता बोरनारे व दिनेश बोरनारे या दहा जणांविरुद्ध वैजापूर पोलीस ठाण्यात गुन्हा दाखल करण्यात आला आहे.