Shivsena News : कल्याण-डोंबिवलीत युतीची मतदानापूर्वीची घौडदौड कायम; भाजपपाठोपाठ शिवसेनेच्या बिनविरोध उमेदवारांचा चौकार

Kalyan Dombivli News : कल्याण-डोंबिवली महानगरपालिकेच्या सार्वत्रिक निवडणुकीत भाजपा खालोखाल शिवसेना पक्षाने देखील मतदानापूर्वीच खाते उघडले आहे. प्रभाग क्रमांक 24 मधून रमेश म्हात्रे, विश्वनाथ राणे आणि वृषाली जोशी हे शिवसेनेचे 3 उमेदवार बिनविरोध निवडून आले आहेत. याशिवाय याच प्रभागातून भाजपच्या ज्योती पाटील यांचाही विजय निश्चित झाल्याने, महायुतीने या प्रभागावर संपूर्ण पकड मिळवली आहे. या 3 उमेदवारांव्यतिरिक्त प्रभाग क्रमांक 28 मधून शिवसेनेचे उमेदवार हर्षल राजेश मोरे हे बिनविरोध विजयी झाले आहेत.

प्रतिस्पर्धी उमेदवारांनी अखेरच्या टप्प्यात माघार घेतल्याने बिनविरोध निकाल लागले. मात्र, हा निकाल केवळ तांत्रिक विजय नसून, तो शिवसेनेच्या संघटनात्मक ताकदीचा आणि स्थानिक पातळीवरील प्रभावी व्यवस्थापनाचा परिणाम असल्याची चर्चा राजकीय वर्तुळात रंगू लागली आहे. विशेष म्हणजे, महापालिका निवडणुकीच्या सुरुवातीलाच शिवसेनेने बिनविरोध तिहेरी विजय मिळवत वातावरण आपल्या बाजूने वळवले आहे.

या निकालानंतर उपमुख्यमंत्री एकनाथ शिंदे आणि खासदार डॉ. श्रीकांत शिंदे यांनी तिन्ही नवनिर्वाचित नगरसेवकांचे अभिनंदन केले आहे. कल्याण-डोंबिवलीतील अंतर्गत गटबाजी, नाराजी आणि इच्छुकांची संख्या पाहता हा विजय सहज मिळालेला नसून, स्थानिक पातळीवरील समन्वय, संवाद आणि अचूक राजकीय गणित यामुळेच हे यश मिळाल्याचे बोलले जात आहे.

विशेष बाब म्हणजे, या प्रभागातील शिवसेनेचा बिनविरोध विजय हा आगामी राजकीय समीकरणांचा संकेत मानला जात आहे. महायुतीचा महापौर बसणार, आणि त्यामध्ये शिवसेनेची नगरसेवक संख्या लक्षणीय असेल, अशी चर्चा आता उघडपणे सुरू झाली आहे. सूत्रांच्या माहितीनुसार, येत्या एक-दोन दिवसांत आणखी काही प्रभागांमध्येही शिवसेनेचे उमेदवार बिनविरोध निवडून येण्याची शक्यता नाकारता येत नाही.

निकाल जाहीर होताच शिवसेना कार्यकर्त्यांमध्ये उत्साह संचारला असून, हा विजय केवळ एका प्रभागापुरता मर्यादित न राहता आणखीन काही प्रभागात आपले खाते बिनविरोध उघडण्यासाठी शिवसेनेने पाऊल उचलले आहे.