Ladki Bahin Yojana: 'लाडकी बहीण'मुळे महायुती सरकारची दमछाक; सणासुदीच्या काळातच लाखो गरीब कुटुंबाचा 'आनंद' हिरावणार

Mumbai News : विधानसभा निवडणुकीत गेमचेंजर ठरलेल्या लाडकी बहीण योजनेमुळे महायुती सरकारची चांगलीच दमछाक होऊ लागली आहे. राज्याच्या तिजोरीवर या योजनेमुळे मोठा आर्थिक भार पडत आहे. आता या योजनेमुळे एकनाथ शिंदे यांच्या मुख्यमंत्रि‍पदाच्या कार्यकाळात सुरू झालेल्या अनेक योजनांना कात्री लागण्याचं वारंवार बोलले जात आहे. अशातच आता सरकारकडून दिला जाणारा 'आनंदाचा शिधा' यावर्षी मिळणार नसल्याची धक्कादायक माहिती समोर येत आहे.

अन्न व नागरी पुरवठा विभागाकडून सणासुदीला दिला जाणाऱ्या ‘आनंदाचा शिधा’ कडे लाखो गरीब कुटुंबांचं लक्ष लागलेलं असतं. आनंदाचा शिधामुळे (Aanandacha Shidha) अनेक गरीब कुटुंबाना दिलासा मिळत असतो. पण यंदाच्या वर्षी सरकारकडून ‘आनंदाचा शिधा’ दिला जाणार नसल्याचं बोललं जात आहे.

राज्य सरकारच्या तिजोरीवर 'लाडकी बहीण' योजनेमुळे (Ladki Bahin Yojana) प्रचंड ताण येत असल्यामुळे आनंदाच्या शिधा योजनेला यावर्षी अडचणीत आली आहे. शिवभोजन थाळी या स्वस्तात भोजन पुरवणाऱ्या योजनेतही काटकसर करावी लागणार असल्याची माहिती सूत्रांकडून मिळत आहे. यामुळे सर्व सामान्य नागरिकांना मोठा फटका बसणार आहे.

एकनाथ शिंदे मुख्यमंत्री असताना सुरु करण्यात आलेल्या आनंदाचा शिधा या योजनेअंतर्गत दिवाळी, शिवजयंती, डॉ. बाबासाहेब आंबेडकर यांच्या जयंतीनिमित्त आनंदाचा शिधाचं वाटप केलं जातं. या शिधात 100 रुपयात 4 वस्तू दिल्या जातात. मात्र, या वस्तूंची बाजारात किंमत 500 रुपये इतकी आहे. त्यामुळे उरलेले 400 रुपये राज्य सरकार भरते तो बोजा सरकारवर पडतो. त्यामुळे या दोन्ही योजना बंद करायच्या का? अशी चर्चा सुरू असल्याचं सूत्रांनी सांगितलं.

राज्य सरकारकडून दिला जाणारा ‘आनंदाचा शिधा’ वितरित केला जाणार नसल्यामुळे अनेक गरीब कुटुंबांवर परिणाम होण्याची शक्यता आहे. यासोबतच, ‘शिवभोजन थाळी’ या स्वस्त दरात भोजन पुरवणाऱ्या योजनेतही यंदा काटकसर करावी लागणार असल्याची माहिती सूत्रांकडून मिळाली आहे.