Mumbai Politics : 'महाराष्ट्र से बिहार तक...', उत्तर भारतीय सेनेने ठाकरे बंधूंना डिवचलं, थेट मातोश्रीबाहेर बॅनरबाजी करत परप्रांतियांना दिला सावधानतेचा इशारा

Mumbai News, 05 Nov : राज्य निवडणूक आयोगाने अखेर स्थानिक स्वराज्य संस्थांच्या निवडणुकीचा कार्यक्रम जाहीर केला आहे. त्यानुसार राज्यातील 246 नगर परिषदा आणि 42 नगर पंचायतींसाठी येत्या 2 डिसेंबरला मतदान होणार आहे.

तर मतदानाच्या दुसऱ्याच दिवशी म्हणजे 3 डिसेंबरला मतमोजणी होणार आहे. निवडणुकीचा कार्यक्रम जाहीर झाल्यामुळे एकीकडे राज्यातील राजकीय घडामोडींना वेग आला आहे. तर दुसरीकडे मुंबईत उत्तर भारतीय सेनेने थेट 'मातोश्री'च्या बाहेर उत्तर परप्रांतियांना सावधानतेचा इशारा देत एकसंध राहण्याचं आवाहन करणारे बॅनर लावले आहेत.

या बॅनरमुळे आता नव्या वादाला तोंड फुटण्याची शक्यता आहे. कारण आगामी मुंबई महापालिकेसह इतर नगरपालिका आणि नगरपंचायतींच्या निवडणुकीत उद्धव ठाकरेंची शिवसेना आणि राज ठाकरे एकत्रित लढणार असल्याचं जवळपास निश्चित आहे. शिवाय ठाकरेंनी मराठी भाषेचा आणि परप्रांतियांचा मुद्दा चांगलाच लावून धरला आहे.

अशातच आता उत्तर भारतीय सेनेने केलेली बॅनरबाजी अप्रत्यक्षरित्या ठाकरेंना डिवचण्यासाठी केल्याची चर्चा सुरू झाली आहे. या बॅनरवर 'सावधान' असा इशारा देत, 'उत्तर भारतीय बटोगे तो पिटोगे, महाराष्ट्र से बिहार तक, राजस्थान से यूपी तक' असं लिहिलं आहे.

तर या बॅनरवर उत्तर भारतीय सेनेचे अध्यक्ष सुनील शुक्ला यांचा फोटोही छापण्यात आला आहे. त्यामुळे आगामी निवडणुकीत उत्तर भारतीय मतदारांतचं विभाजन होऊ नये यासाठी आता परप्रातियांना उत्तर भारतीय सेनेकडून आवाहन केलं जात असल्याचं पाहायला मिळत आहे.

उत्तर भारतीय सेनेचे अध्यक्ष सुनील शुक्ला यांनी मागील काही दिवसांत महाराष्ट्रातील उत्तर भारतीयांसाठी आक्रमक भूमिका घेतली होती. मनसे अध्यक्ष राज ठाकरे यांच्या भाषणांविरोधातही त्यांनी आवाज उठवला होता. अशातच आता त्यांनी ऐन निवडणुकीच्या तोंडावर केलेल्या या बॅनरबाजीमुळे नव्या वादाला तोंड फुटण्याची शक्यता वर्तवली जात आहे.