Eknath Shinde Twitter hack : एकनाथ शिंदेंच्या अधिकृत ट्विटर अकाऊंटवर तुर्की अन् पाकिस्तानचे व्हिडिओ दिसल्याने खळबळ, तपासात धक्कादायक कारण आलं समोर

Eknath Shinde Twitter Hacked : राज्याचे उपमुख्यमंत्री एकनाथ शिंदे यांचे एक्स (पुर्वीचे ट्विटर) अकाऊंट हॅक झाल्याची माहिती समोर आली आहे. धक्कादायक बाब म्हणजे हॅक झालेल्या अकाऊंटवर तुर्की आणि पाकिस्तानशी संबंधित व्हिडिओ आणि लाईव्ह स्ट्रीमिंग दिसत आहे.

त्यामुळे आता राज्याच्या राजकारणात एकच खळबळ उडाली असून हे अकाऊंट नेमकं कोणी आणि कसं हॅक केलं? याबाबतच्या चर्चांना उधाण आलं आहे. मागील काही दिवसांपूर्वी काही नेत्यांचं देखील या पद्धतीने ट्विटर अकाउंट हॅक झाल्याच्या घटना समोर आल्या होत्या.

मात्र, आता थेट राज्याच्या उपमुख्यमंत्र्यांचं अकाउंट हॅक केल्याने आश्चर्य व्यक्त केलं जात आहे. दरम्यान, ट्विटर अकाऊंट हॅक झाल्याचं समजताच एकनाथ शिंदेंच्या टीमने तात्काळ एक्स सोशल मीडिया प्लॅटफॉर्मकडे तक्रार दाखल केल्यानंतर आता ते रिकव्हर करण्यात आले आहे.

मात्र, राज्याच्या प्रमुख पदावर असलेल्या व्यक्तीचे सोशल मीडियाचे खाते असं हॅक होणं ही अत्यंत गंभीर घटना मानली जात आहे. कारण उपमुख्यमंत्र्यांच्या या अधिकृत खात्यावरून अनेक महत्त्वाच्या शासकीय आणि राजकीय माहितीचे प्रसारण केले जाते.

दरम्यान, थोड्या वेळातच एकनाथ शिंदेंचे एक्स खाते रिकव्हर केले असले तरी ही घटना उच्चस्तरीय सायबर हल्ला आणि राजकीय हस्तक्षेप मानली जात आहे. सायबर पोलिसांकडून या घटनेचा तपास करण्यात येत आहे. सायबर पोलिसांकडून आयपी अॅड्रेस तपासले जात असून हे खाते हॅक करण्यामागे नेमका हेतू काय होता? याचा शोध सायबर पोलिसांकडून घेतला जात आहे.